Дьокуускайга Ис дьыала министиэристибэтин салаатын судаарстыбыннай өҥөлөр Киинэ арылынна

Чайковкого уулуссаҕа турар Госуслуга Киинигэр Дьокуускай олохтооҕо Светлана Иванова тас дойдуга барар паспорын ый инниттэн оҥотторбута бэлэм буолбутун ыла кэлбит.

Светлана Иванова, Дьокуускай олохтооҕо: «Оҥоһуллубута ыраатта. Бэйэм саҥа ыла кэллим. Үһүс сырыыбынан кэлэн ыллым».

Ис дьыала министиэристибэтин салаатынан судаарыстыбыннай өҥөлөрү оҥорор Киин бу сайыҥҥыттан саҕалаан үлэлии турар. Манна паспорт, загранпаспорт, прописка, выписка,ону тэҥэ сокуоннай саастарын ситэ илик оҕолорго гражданстволарын туоһулуур штамп кэлэн оҥотторуохха сөп.

Ньургуйаана Аталларова, СӨ ИДьМ миграция боппуруостарыгар салаатын салайааччы: «Бу сылга 21 тыһ. тахса Арассыыйа пааспара бэриллибитэ. Тас дойдуга барар пааспар 54 тыһ. тахса. Куорат иһинэн 31 киһи пропискаламмыта».

Киини үөрүүлээхтик аһыы тэрээһинигэр Ил Дархан Айсен Николаев кытынна.

Айсен Николаев нэһилиэнньэҕэ оҥоһуллар өҥө бары өттүнэн табыгастаах буолуохтаах, итиэннэ саҥа киин салгыы дьоҥҥо-сэргэҕэ көмөлөөх өҥөлөрү ситиһиилээхтик толоруо диэн бэлиэтээтэ. Бастыҥ үлэлээхтэргэ Ил Дархан махтал суруктары, наҕараадалары туттарда.

Евгений Григорьев, Дьокуускай куорат баһылыга: «Туһалаах уонна наадалаах киин буолар. Дьоннор куоратынан барытынан сылдьыбакка, барытын биир сиргэ кэлэн биир күн иһигэр ылыахтарын сөп».

Докумуоннары тыыннаах уочаратынан Госуслуга сайтын нөҥүө ыытыахтарын, эбэтэр эрдэттэн суруттаран бэйэлэрэ аҕалыахтарын сөп, биитэр МФЦ нөҥүө эмиэ паспорт, прописка, гражданство боппуруостарынан өҥө ылар кыахтаахтар.

Ольга Кельциева, СӨ ИДьМ миграция боппуруостарыгар салаатын эксперт-исписэлииһэ: «Бу киин сайыҥҥаттан үлэлии турар. Туохтан да үлэ тохтооһуна суоҕа».

Киһини туоһулуур сүрүн докумуону, регистрацияны оҥотторуу тэҥэ, Кииҥҥэ ГАИ дьыалатынан эмиэ кэккэ өҥөлөрү оҥороллор. Ол курдук, массыынаны учуокка туруоруохха, ыытар дастабырыанньа, технадзорунан переоборудование эмиэ оҥоторуохха сөп.

Василий Лугинов, СӨ ИДьМ суолга-иискэ госинспиэксийэтин транспоры регистрациялыыр салаатын салайааччы: «Манна дьоннор Госуслуги нөҥүө суруттарыахтарын сөп. Күҥҥэ аҥардас учуотка туруорааһыны 150-200 киһи оҥостор».

Онон, олус наадалаах өҥөлөр биир дьиэҕэ бэлэмнэнэр буолбуттара хас биирдии киһиэхэ табыгастаах буолар.