Идэҕэ урутаан бэлэмниир Кииҥҥэ "Билет в будущее" бырайыак түмүгүн таһаардылар

Абый улууһун Абый нэһилиэгиттэн сылдьар Владимир Дохунаев олохтоох оскуолаҕа тэрийээччи педагогунан үлэлиир. Абый нэһилиэгин орто оскуолата 60-ча үөрэнээччилээх, аны саас оскуоланы 10 оҕо бүтэриэхтээх. Оскуолалара номнуо хаһыс да сылын "Билет в будущее" диэн бэдэрээлинэй бырайыакка кыттыһан үлэлиир

Владимир Дохунаев, Абый нэһилиэгин орто оскуолатыгар педагог-тэрийээччи: «Биһи оскуолабытыгар “Билет в будущее” диэн баар. Үһүс сылын үлэлиир. Үлэһиппит Корякина Татьяна Владимировна оҕолорго профориентационнай дьарыктары, уруоктары ыытар».

2021 сыллаахтан өрөспүүбүлүкэтээҕи идэҕэ урутаан бэлэмниир Киин Саха сиригэр бэдэрээлинэй бырайыактары оллоххо киллэриинэн көхтөөхтүк дьарыктанар. Олор истэригэр оскуола үөрэнээччилэригэр анаммыт "Билет в будущее" бэдэрээлинэй бырайыак операторынан үлэлиир. Бу бырайыака оскуола үөрэнээччилэрэ номнуо 6 кылаастан саҕалаан ханнык идэҕэ бэйэлэрин көрөллөрүн быһаарыналларыгар күүс-көмө буолаллар.

Владислав Хабаров, СӨ идэҕэ урутаан үөрэтэр киин салайааччыта: «Урут идэ туһунан кылаас чааһыгар эбэтэр экскурсияларга тахсан кэпсиир буоллахтарына биһиги “Билет в будущее” бырайыак нөҥүө идэни илиилэринэн боруобалаан көрөллөрүгэр тиийдибит».

Бырайыак 4 сыллааҕы түмүгүн таһаарар тэрээһиҥҥэ үөрэҕирии салалтатыттан, оскуолалартан, үөрэх кыһаларыттан кэлэн кытыннылар. Профориентация хайысхатыгар бастыҥ үлэлээх орто үөрэх тэрилтэлэрэ кэлэн маастар-кылаастары көрдөрдүлэр. Ол курдук промышленнай техникум, Покровскайдааҕы Айтыын уонна Чурапчытааҕы аграрнай-техническэй колледжтар идэҕэ киириини сиһилии билиннэрдилэр.

Анна Дьячковская, Чурапчытааҕы аграрнай-техническэй колледж методииһа: «Быйылгы үөрэх дьылыгар “Билет в будущее” бырайыакка кытынныбыт. Квотанан уон киһини биэрбиттэрэ. 50-ча киһини хабаммыт ыыттыбыт. 200 киһини хабыахтаахпыт, онно биһи колледжпыт 5-6 компетенциянан хабабыт».

Тэрээһин кыттыылаахтара идэни талыыга оҕолорго туох-ханнык үлэҕэ болҕомто ууруллуохтааҕын, ханнык түһүмэхтэри ааһалларын, тестирование, онтон да атын суолталаах хардыылар табыгастаахтык оҥоһуллуохтаахтарын билистилэр. Билет в будущее бырайыак салгыы өссө тупсан оскуолаларга салҕанан барара күүтүллэр.