Саха сиригэр киинэ устарга анаан үп көрүллэр

Саха киинэтин сайдыытыгар Өрөспүүбүлүкэ салалтатын өтүттэн элбэх көмө-өйөбүл оҥоһуллар. 2020 сылтан Ил Дархан Айсен Николаев тус ыйааҕынан киинэ оҥорон таһаарыыга субсидия көрүллэр. Быйыл куонкурска барыта 22 сайаапка киирбититтэн, тоҕус киинэ бырайыага кыайыылах таҕыста.

Саха киинэтэ куруук саҥа рекордары олохтуур, бу барыта Саха сиригэр киинэ хайысхата сайдан иһэрин, үрдүк таһымҥа тахсыбытын көрдөрөр. Оттон бу маннык суударыстыбаттан көмө саҥа саҕалааччыларга да, уопуттаах киинэ уустааччыларга да улахан күүс-көмө буолар.

Илларион Яковлев, киинэ режиссёра: «Ити суумма элбэҕи көмөлөһүө. Улаханнык махтанабын. Билигин да итэҕэйбэккэ сылдьабын».

Амма улууһуттан сылдьар Семен Аманатов биллэр киинэ режиссера, продюсара. Кини уһулбут киинэлэрэ куруук бастыннарга сылдьар. Ол курдук быйыл Триумф уонна Кыталыктаах кырдалым киинэлэр билигин аан дойду күөх экраннарыгар көстө тураллар.

Семён Аманатов, киинэ режиссёра, продюсер: «Мумбаи уонна Дели куоракка аншлаг буолан ааста. Бу саҥа Францияттан киинэбитин көрдөрөн кэллибит. Кэлэр сылга үлэлиир былааннарбыт - күүстээх санаалаахтык түһүнэргэ».

Саха киинэтэ билигин Арассыыйаҕа эрэ буолбакка, Аан дойду үрдүнэн биллэр. Режисердар араас жанрдарга үлэлэһэр буоллулар, уопут улаатта.

Сергей Местников, СӨ Бырабыытылыстыбатын бэрэссэдээтэлин солбуйааччы: «Бу көмө ыытарбыт түмүгэр биһиги киинэбитин дьон олус сэргээн көрөр.  Арассыыйа таһымыгар 3 регион киинэни устан таһаарар: Москва, Санкт-Петербург уонна Саха сирэ».

Саха киинэлэригэр история чахчыта көстөрүн таһынан, төрөөбүт дойдуга таптал, патриотическай санаа күүһүрэр. Аны эһиил өссө тоҕус саҥа киинэ улахан экранна тахсыаҕа.