Бу күннэргэ Саха сиригэр үс улууска 4 саҥа баһаарынай депо арылынна

Өрүү бастакынан дьон олоҕун быыһыы. Хатырык нэһилиэгин баһаарынай чааһа Нам улууһугар биир бастыҥ. Номнуо 25 сыл тустаах чаас сулууспатын үрдүк суобастаахтык тутар. Оттон бу күннэргэ саҥа баһаарынай депо арыллан үлэһиттэр өр кэтэспит баҕа санаалара туолла. Андрей Полятинскай 4 сылын бу баһаарынай чааска үлэлиир. Кэтэһиилээх эбийиэк олоххо киирэн үлэлиир усулуобуйа биллэ тубуста диэн этэр.

Андрей Полятинский, Нам улууһун баһаары утары сулууспатын 23 №-дээх этэрээтин үлэһитэ: «Саҥа баһаарынай чааска киирэн үөрүүбүт муҥура суох. Эрчиллэр саала баар буолуохтаах. Профилактика үлэтин күүскэ ыытабыт».

23 нүөмэрдээх баһаарынай этэрээт өссө 1999 сыллаахха тэриллибитэ. Ааспыт сылга диэри тустаах чаас эргэ хаарбах туруктаах дьиэҕэ үлэлии-хамныы олорбуттара. Онтон сааскы халаан уута кэлэн дьиэ каркаһын бүтүннүү ылан, баһаарынайдар аһаҕас халлаан анныгар хаалбыттара.

Артур Ноговицын, Хатырык нэһилиэгин баһылыга: «Сүрдээх элбэх киһи үлэлээтэ. Ууга баран игин эбийиэкпит эргэрэн сөптөөх быһаарыы ылылынна».

Оттон тустаах баһаарынай чаас Хатырык эрэ нэһилиэгин буолбакка чугастааҕы нэһилиэктэри барытын хабан үлэлиир. Күн бүгүн манна 10 үлэһит баар. Бу бары олохтоох дьон. Бары сулууспаларыгар бэринилээх, хаһыс да сылларын үлэлииллэр.

Николай Парников, Нам улууһун баһаарынай этэрээтин салайааччытын солбуйааччы: «Бу баһаарынай чаас уон үлэһиттээх. Бары Хатырык олохтоохторо үлэлииллэр. Профилактика өттүнэн саамай күүскэ үлэлиир чааспыт буолар. Сыл аайы манна баһаартан эмсэҕэлээһин суоҕун кэриэтэ».

Киэҥ-куоҥ, бары материальнай техническэй баазанан толору хааччыллыылаах эбийиэккэ баһаарынайдар үлэлэрэ өссө таһаарыылаах буолара саарбаҕа суох.