Суолга бэрэбиэркэ үлэтэ күүһүрэр

Сэтинньи 22 күнүттэн саҕалаан суолга-иискэ бэрэбиэркэ үлэтэ кытаатта. Дьокуускайга маннык рейдэлэри тиһигин быспакка ыыталлар. ГАИ иниспиэктэрдэрэ күн ахсын күнүстэри-түүннэри ыытааччылары бэрэбиэркэлииллэр. Саамай кэлиилээх-барыылаах суоллар быһа охсуһууларыгар туран куорат араас оройуоннарыгар дьуһуурустубалыыллар. Суоппар докумуонун, быраабын, страховкатын көрдөрөр. 

Жанна Макарова, Дьокуускайдааҕы суолга куттал буолуутун хааччыйар сулууспа сырдатар үлэҕэ иниспиэктэрэ: “Сүрүн болҕомто суоппар бырааба суох, аһыы утаҕы испит, дьону сыыһа олордо сылдьар суоппардарга. Холобур, оҕо харыстыыр кириэһилэлээх буолуохтаах. Бары олорсон иһээччилэр курданыахтаахтар. Ону таһынан ыстарааптарын төлөөбөккө сылдьар, массыыналарын учуокка туруорбакка эрэ ыыта сылдьар дьон баар буолар”.

Ааспыт нэдиэлэҕэ Дьокуускайга 46 суол быһылаана тахсыбытын түмүгэр 3 киһи эчэйдэ. Маны тэҥэ арыгыны иһэн баран уруулга олорооччу ахсаана аҕыйаабат. Ол курдук аҥаардас биир нэдиэлэ иһигэр 43 итирик суоппары туттулар, аҥаардара арыгы иһиилээх хаттаан уруулга олорбуттара билиннэ. Барыта балтараа тыһыынчаттан тахса быраабы кэһии түгэнэ бэлиэтэннэ.

Татьяна Николаева, корреспондент: “Киин куоракка сыл саҕаланыаҕыттан уопсайа түөрт тыһыынча кэриҥэ суол быһылаан таҕыста. Ол түмүгэр 500-чэкэ киһи араас эчэйиини ылла, 16 киһи суорума суолланна. Саахал ахсаана аҕыйаабыт, ол оннугар эчэйии элбээбит”.

Оттон өрөспүүбүлүкэни бүттүүн ылар эбит буоллахха, Саха сиригэр тохсунньу ыйтан саҕалаан 680-тан тахса суол быһылаана таҕыста. Саахал түмүгэр 900 киһи араас эт-хаан эчэйиитин ылла, 72 киһи суорума суолланна.  Былырыыҥҥыны кытта тэҥнээтэххэ, куоракка курдук киһи өлүүтүн көрдөрүүтэ үрдээтэ. Суолга тахсар саахаллар сүрүннээн түргэн айантан уонна суол быраабылатын тутуспаттарын иниспиэктэрдэр бэлиэтииллэр.

Майя Местникова, СӨ суолга куттал суох буолуутун хааччыйар судаарыстыбаннай иниспиэксийэ аҕа иниспиэктэрэ: “Былырыыҥҥы көрдөрүүттэн 8,8% суол саахала аҕыйаабыт. Ол гынан баран киһи өлүүтэ элбээтэ”.

Сотору кэминэн бырааһынньыктааҕы сүпсүлгэн саҕаланыа турдаҕа. Онон суол-иис кыттааччылара, ыытааччылар эрэ буолакка, сатыы сылдьааччылар  эмиэ айан суолугар бэрт сэрэхтээх буоларга ыҥыраллар.