Саха сүөһүтэ хааһына тэрилтэ 5 сыллаах үлэтин түмүгүн таһаарда

"Саха сүөһүтэ" генопуонда тэрилтэтин биир бастыҥ үлэлээх салаата Ньурба улууһун Акана нэһилиэгин хаһаайыстыбата. 2020 сыллаахха тэриллэн билигин саха боруодатын хороҕор муостааҕын элбэтиигэ сүҥкэн үлэни оҥорор. Аан бастаан 50 сүөһүнү аҕалбыт эбит буоллахтарына,  4 сыл иһигэр төбө ахсаана 135 тэҥнэспит. Онон нэһилиэккэ, бүтүн улууска тыа хаһаайыстыбатын сайыннарыыга олук буолбут итиэннэ үлэ миэстэтин таһаарбыт.

Ефрем Семёнов, Ньурба улууһун Акана нэһилиэгин баһылыга: "бу тэрилтэ биһиги нэһилиэкпитигэр кэлэн элбэх үлэ миэстэтэ таҕыста. Сыллааҕы оту эмиэ нэһилиэк дьоно оттоон биэрэр, ону тэрилтэ атыылаһар. Сылга 160 туонна былааны олохтоохтор оттоон биэрэллэр. Сыллата күрүө-хаһаа тутулларыгар эмиэ дьон үлэлэһэр. Онон үлэ баар буолан дьон үлэлиир. Бу сүрдээх үчүгэй".

Саха ынаҕа тыыннаах ордон хаалбыт улууһунан Эбээн Бытантай буолар. Бу мантан саха норуотун төрүт сүөһүтэ иккистээн сайдар суолга турбута. Онон күн бүгүн Эбээн Бытантайга саамай элбэх саха сүөһүтэ баар. Оттон тустаах тэрилтэ салаатыгар 128 төбө иитиллэр.   

Сахалина Роббек, Эбээн Бытайдааҕы салаа үлэһитэ: "Торбоспут 45, оттон субаммыт 39. Кыстык оппут тиийэр. Билигин ынах ыабаппыт. Тохсунньуга төрөөн саҕалаатахтарына ыахпыт ".

Саха сүөһүтэ генопуонда тэрилтэ күн бүгүн 8 салаалаах. Эбээн Бытантай, Амма, Ньурба, Үөһээ Бүлүү, Горнай, Нам улуустарыгар. Бу биэс сыл иһигэр хороҕор муостаах ахсаана 2 төгүл үрдээтэ. Бу сыллар тухары 900 тахса миэстэлээх 9 хотон тутулунна. Итиэннэ салгыы былаан киэҥ.

Егор Посельский, "Саха сүөһүтэ" хааһына тэрилтэ салайааччытын солбуйааччыта: "Эбээн Бытантай Кустуур нэһилиэгэр 100 миэстэлээх хотону тутаары былаанныыбыт. Маны тэҥэ Маҕараска баар салаабытыгар эмиэ улахан хотон былааҥҥа баар".

Онон саха төрүт сүөһүтүн боруода быһыытынан тэнитэр, сайыннарар тэрилтэ инникитин да кэҥиир, Саха сирин бүттүүнүн хабар соруктаах. Маныаха дьоһуннаах олук - саха ынаҕа хааһына тэрилтэтэ.