Дьокуускайга сыл бүтүөр диэри 4 үөрэх эбийиэгэ тутуута түмүктэнэр

Болдьоҕу баттаһа үлэһиттэр күнүстэри-түүннэри үлэ. 17 тыһ. тахса квадратнай миэтирэ иэннээх, 3 этээстээх оскуолаҕа тэҥинэн араас үлэ ыытыллар, уот тардыыта, истиэнэлэри кырааскалааһын, оттон оҥоһуллан бүппүт кабинеттарга сууйуу-сотуу. 1000 кэриҥэ үөрэнээччини хабар оскуола аныгылыы тупсаҕай оҥоһуулаах, манна оҕолорго бары усулуобуйа оҥоһуллар.

Николай Семёнов, бэдэрээтчит: «Билиҥҥи туругунан бэлэммит 95%. Кылаастар уонна парта, доска туруоруута бара турар. Икки улахан спортзаллаахпыт уонна актовай зал».

Саҥа оскуолаҕа 33 кылаас баар буолуоҕа. Манна хайысханан учуутал, быраас, энергетик уонна программист үөрэҕэр туттарсар оҕолору бэлэмнээн таһаарыахтара. Итиэннэ манна кыргыттарга астыыр-иистэнэр оттон уолаттарга уһанар мастарыскыайдар баар буолуохтара. Билигин матырыйаал барыта кэлэн турар.

29 оскуола салҕааһыныгар үлэ түмүктүүр чааһыгар эмиэ тиийэн эрэр. Манна үлэһиттэр эмиэ эбийиэк ис бараанын оҥороллор. Бу 29 оскуола эбии тутуутугар биир сменаҕа 350 оҕо үөрэнэр кыахтаныа. 3 этээстээх, 8 тыһ. квадратнай миэтирэ иэннээх саҥа үөрэх кыһата эмиэ киэҥ-куоҥ, сырдык, аныгылыы тииптээх. Манна даҕатан эттэххэ, Саха сиригэр "Үөрэҕирии" национальнай бырайыагынан оскуолаларга эбии салҕааһын хас да эбийиэк тутуллар.

Виктор Романов, СӨ тутуу миниистирэ: «"Үөрэҕирии" нацбырайыак чэрчитинэн бу Дьокуускайга үс пристрой тутулла турар, ону тэҥэ бу 29№-дээх оскуолаҕа эмиэ тутулла турар. 450 миэстэлээх Мохсоҕоллоох оскуолатыгар тутулла турар, бэлэмэ үрдүк таһымнаах, бу ыйга үлэҕэ киллэриэхтэрэ».

Онон тустаах бырагырааманан бу сыл бүтүөр диэри хас да эбийиэк үлэҕэ киириэҕэ. Оттон "Үөрэҕирии" национальнай бырайыак үлэлээн саҕалыаҕыттан Саха сиригэр 5 сыл иһигэр номнуо 50-чэ үөрэх кыһата тутуллан үлэҕэ киирдэ.