Чурапчы улууһун Бахсы нэһилиэгэр саҥа култуура дьиэтэ үлэҕэ киирдэ

Бу түгэни Бахсы нэһилиэгин дьоно-сэргэтэ күүппүттэ ыраатта. Саҥа култуура дьиэтэ Култуура национальнай бырайыак чэрчитинэн икки сыл иһигэр туттуллан киирдэ.

Тарас Местников аатын сүгэр саҥа култуура дьиэтэ 2 мэндиэмэннээх, киэҥ-куоҥ, элбэх сырдык хостордоох, миэбэлинэн, уотунан-күөһүнэн толору хааччыллыбыт. Сүрүн болҕомто кэнсиэрдиир саалаҕа ууруллубут. Бу артыыска саамай сүрүн оруолу оонньуур диэн култуура үлэһиттэрэ үөрэ кэпсииллэр.

Надежда Барашкова, Бахсы нэһилиэгин олохтооҕо: «Кыра нэһилиэк буоламмыт хас түмсүү аайы барытын салайсан, киирэн кыттыһан иһэбит. Ону таһынан, оҕолорбутугар үчүгэй саҥа дьиэҕэ ырыа, үҥкүү уонна куруһуок хосторо эмиэ бааллар».

Саҥа култуура дьиэтэ киирэн олохтоохтор айар-талааннарын, дьоҕурдарын өссө сайыннаран, култуура эйгэтин үлэтэ саҥа таһымҥа тахсыа диэн бигэ эрэллээхтэр.

Степан Саргыдаев, Чурапчы улууһун баһылыга: «Сырдык, сылаас. Мин санаабар, мантан кынат анньынан ыччаттар Саха сирин култууратын сайыннарыа этилэр».

Бу күн Ытык Бахсы олохтоохторо кыралыын, улаханныын бары үөрүүлэрин үллэстэ кэлбиттэр. 

Бу маннык саҥа эбийиэктэр туттуллан олоххо киирэллэрэ, нэһилиэк олоҕо сайдарыгар, инники кэскилэ кэрэни кэрэхсииригэр, талааннар арыллалларыгар, ыччат дьон тыа сиригэр үлэлииригэр-олохсуйарыгар төһүү күүс буолар.

Сергей Местников, СӨ Бырабыытыластыбатын бэрэссэдээтэлин солбуйааччы: «Өрөспүүбүлүкэбит култууратын эйгэтигэр олус элбэхтэр. Кинилэр үлэлэрин, култуураҕа кылааттарын сыаналаан маннык култуура эбийиэгэ тутуллунна. Эдэр ыччат биһи норуоппут култууратын хайысхатыгар үөрэнэн киэҥ аартыкка үүктэниэхэтэрэ диэн эрэнэбит».

Оттон бу сылга Өрөспүүбүлүкэ үрдүнэн өссө хас да саҥа култуура эбийиэктэрэ үлэҕэ киирэллэрэ былааннанар.