Кэбээйигэ саҥа уһуйаан тутуута түмүктэнэн эрэр

2015 сыллаахха Кэбээйи нэһилиэгин "Мичээр" оҕо уһуйаана хаарбах туруктааҕынан ааҕыллан, сабыллыбыта. Ол кэмтэн ыла, күн бүгүҥҥэ диэри уһуйаан хас да сиринэн, тарҕанан үлэлии олорор. Оттон муус оннуттан хамсаабытыгар диэри, бу сыл олунньутугар саҥа оҕо саадын тутуллуута саҕаламмыта. Билигин номнуо үлэ күргүөмнээҕэ баран, бүтэр уһугар тиийэрэ чугаһаабыт.

Билигин бу эбийиэги "Прогресс" диэн тутар тэрилтэ бэйэтин үбүнэн дьэндэтэ сылдьар. Саҥа уһуйаан 140 миэстэлээх, ол эбэтэр 8 бөлөҕү хабар, 2000 кэриҥэ кыбадыраатынай миэтэрэ иэннээх, 2 мэндиэмэннээх аныгы ирдэбилгэ толору эппиэтиир. Күн бүгүн уота-күөһэ, ититэр ситимэ, вентиляцията барыта киирэн турар.

Андрей Протодьяконов, тутуу тэрилтэтигэр тутуу чааһыгар салайааччыны солбуйааччы: «Оҕо уһуйаана бэйэтэ туһунан ууну ыраастыыр станциялаах, онон ыраас уу баар буолар. Уот барар түгэнигэр диэн дизель туруордубут. Тас өттүгэр 8 оҕо оонньуур былаһааккалаах, ону таһынан биир улахан спорт былаакката баар. Барыта эрэһиинэнэн тэлгэтиллэн тураллар. Уһуйаан туох баар оонньууругар, миэбэлигэр, утуйар таҥаһыгар тиийэ барытын бэлэмниибит».

Онон "мичээрдэр" уһуйааннарыгар олоччу бэлэмҥэ киирэллэр. Миэбэлиттэн саҕалаан, иһитигэр тиийэ барытын тутар тэрилтэ хааччыйар. Онон манна саамай үөрбүт дьон - төрөппүттэр уонна үлэһиттэр.

Матрёна Новгородова, "Мичээр" оҕо уһуйаанын сэбиэдиссэйэ: «Биһиги бу уһуйааны кэтэспиппит уон сыл буолла. 2015 сыллаахха хаарбах туруктааҕа бигэргэтиллэн тахсан барбыппыт. Билиҥҥи туругунан 3 сиринэн үлэлии олоробут. Саҥа уһуйааммыт тутуллан бүтэн эрэр. Долгуйа кэтэһэбит».

Аны бу нэдиэлиэҕэ уһуйаан ис бараанын киэргэтэ, дизайынын оҥоро халыҥ хамаанда кэлиэхтээх. Оччого саҥа  оҕо саада силигин ситэн иитиллээччилэригэр кэрэни, сырдыгы эрэ түстүөҕэ.