Ахсынньы эмиэ сылаас буолара күүтүллэр

Аам-даам тымныытынан, будулҕан туманынан биллэр ахсынньы ыйбыт саҕаланна эрээри, сорох көтөрдөр сылаас дойдуга барарга ыксаабаттар. Холобура,  Кэбээйи оройуонугар соҕотох хопто сылдьарын аҕыйах күннээҕитэ олохтоохтор көрөн устубуттар. Оттон киин куорат сынньанар пааркатын олохтоохторо эмиэ кыһыҥҥы ууга умсарга ыксаабаттар.

«Сэтинньи ыйга турбут сылаас ахсынньыга эмиэ салҕанар. Ол курдук паарка олохтоохторо да ону туоһулууллар. Билигин тииҥчээннэр, көтөрдөр толору сылдьаллар. Сэтинньигэ нуорматтан 5-12 кыраадыс  сылаас этэ. Оннук күн-дьыл ахсынньыга салҕаныа», Ирена Осипова, корреспондент.

Кыыллары-көтөрдөрү таһынан паркаҕа салгын сии, спордунан дьарыктана сылдьар дьон үгүс. Маныаха өссө быйыл аан бастакытын дьэрэкээн саҥа дьыллааҕы харыйа туруорбуттар. Онон киһи салгын сии таарыйа саҥа дьыл тыынын билэ кэлэр. Николаевтар дьиэ кэргэн хаһыс да сылын хаалыктаах хаамыынан дьарыктаналлар. Быйыл хаһааҥҥытааҕар да сылаас буолан, өссө да хаама сылдьалларын үллэстэллэр.

Төһө да киин эҥэр сылаас күннэр турдаллар, тыала күүстээх итиэннэ сөҥүүлээх.  Үгүс киһи маннык халлааны сөбүлүүр эбит буоллаҕына  саамай хотугу ырыынак атыыһыта Дария Зайцева хабараан тымныытын ордорор. Манна даҕатан эттэххэ, бу ырыынакка атыыһыттар таһырдьа оннооҕор 50 тахса да кыраадыс тымныыга  туран үлэлииллэр.

Дария Зайцева, атыыһыт: «Сылаас буолан баран олус тыаллаах. Киһини курдары үрэр. Төһө да тымныы буолан баран тыала суох буоллаҕына киһи төптөрүтүн тоҥмот».

Сэтинньи ый кырдьык да хаһааҥҥытааҕар да сылаас буолла. Салгын орто температурата нуорматтан 5-12 кыраадыс сылаас турда. Бу маннык көстүү бүтэһигин 1920 сыллаахха бэлиэтэммит. Ол эрэн, бу күннэргэ хотугулуу-арҕаа оройуоннарга антициклон кэлэн тымныйбыт.

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта : «Саамай тымныы Мииринэй метеостанциятыгар бэлиэтэннэ. Манна -48 буолла. Амур уобалаһыттан кэлбит циклон соҕуруу, соҕуруулуу-илин уонна киин оройуоннарга элбэх хаары түһэрдэ. Салгын температурата -16 – 124 тиийэ сылыйда. Кэлэр үс сууккаҕа сылаас хаардаах, тыаллаах күннэр өссө да туруохтара».

Оттон нэдиэлэ бүтүүтэ Красноярскайтан сылаас салгын кэлэн хотугулуу-арҕаа төттөрү сылыйыаҕа, ол эрэн хаардаах буолуоҕа итиэннэ сорох сиринэн тибии түһүөҕэ. Маныаха өбүгэлэрбит билгэлэринэн, ахсынньыга хаардаах, сотору-сотору тыаллаах буоллаҕына - сайын үчүгэй үүнүү буолар. Бу ыйы бэс ыйа батыһар. Онон ахсынньы ыйбытыттан сайыммыт хайдах буолара тутулуктаах.