Сылгыны үөрдээн иитии сайдыытын торума

Саха сылгытын ыраас хаанын харыстааһыҥҥа улахан болҕомто. Биһиги өрөспүүбүлүкэбит төбө ахсаанынан уонна бэйэтэ туһунан 3 боруодалааҕынан Арассыыйаҕа маҥнайгы миэстэҕэ сылдьар. Мэҥэдьэк сылгытын забайкалье боруодатын тупсарыыга номнуо туһаннылар.   Онон конференцияҕа мустубут дойду бастыҥ билим үөрэхтээхтэрэ бары саха боруодатын харыстыыр уонна тэнитэр улахан суолталааҕын ыйдылар. Бу этинэн хааччыныыны үрдэтиини кытта быһаччы сибээстээх.

Артем Александров, СӨ тыа хаһаайыстыбатын миниистирэ: "Тыыннааҕынан эрэ тутан буолбакка этинэн, бородууксуйа быһыытынан атыыга таһаарыы биир сүрүн кыһалҕа".

Маныаха сылгыны сөптөөхтүк аһатыы, саҥа технологиялары туһаныы уонна племенной үлэни күүскэ ыытыы сайдыахтааҕын ыйдылар. Сыспай сиэллээҕи иитэр регионнарга Саха сирин бастыҥ хаһаайыстыбаларын билиһиннэрдилэр.  "Строд" сылгы собуота 700 кэриҥэ түөрэм туйахтааҕы тутан турар. Хаһаайыстыба сылгы төбөтүн элбэтиигэ былааннаахтык үлэлиир.

Василий Тимофеев, И.Я. Строд аатынан сылгы собуотун салайааччы: "Племенной атыыбытын барытын толордубут. 90-ча убаһаны иитиигэ хааллардыбыт. Сылгы собуота буолан баран, иллэрээ сылтан ат убаһалары иитэн эрэбит. Икки сылынан соноҕос атыырдары атыыга таһаарыахпыт".

Конференцияҕа сылгы иитиитигэр сүрүн кыһалҕалары ырытыстылар. Манна иитии технологиятыгар кэлиҥҥи сылларга кэһии тахсарын ыйдылар. Дьөһөгөй оҕотуттан ыраас бородууксуйаны ылар сыалтан киһи атаҕа үктэммэт сиригэр иитиллиэхтээҕин, ол эрэн ыраах ыччат үлэлии тахсара ыараханын, уот-күөс өттүттэн уустуктар бааллара хааччахтыырын эттилэр.

Галина Осипова, СӨ ТХМ кыыл-сүөл сайдыытыгар, племенной хаһаайыстыбаҕа департаменын салайааччытын солбуйааччы: "Сылгыбытын дьиэ таһыгар тутар буоллубут. Технологиятын кэһээһин барар диэн сылыктааһын баар. Билигин ГОСТ ирдэбиллэрэ киирэн эрэллэр. Эт да буоллун, кымыс да буоллун ГОСТ киирэр түгэнигэр төһө СанПин ирдэбилигэр эппиэттиир буолуоҕай".

Бэйэ олохтоох этинэн хааччыныыга, бастатан туран, боруоданы харыстааһын үлэтэ күүскэ ыытыахтааҕын туһунан үгүс иһитиннэрии киирдэ.

Ольга Аксенова, боруоданы харыстааһын национальнай түмсүүтүн сэкирэтээрэ: "Бэйэ олохтоох бородууксуйатынан бэйэни хааччыныы, куттала суох буолуу мэктиэтэ".

Тэрээһин кыттыылаахтара салгыы Ньурба улууһугар мэҥэдьэк боруодатын кытта билистилэр. Саха боруодатын ураты хаачыстыбаларын илэ харахтарынан көрдүлэр.