Дмитрий Садовников Марха уонна Жатай тутууларын көрдө

Биир бастакынан Дмитрий Садовников Жатайдааҕы суудунаны өрөмүөннүүр собуот үлэһиттэригэр тутулла турар уопсай дьиэҕэ сырытта. Манна бырабыыталыстыба бэрэссэдээтэлин бастакы солбуйааччы өр буолбата. Тустаах эбийиэк күн бүгүн болдьохтон букатын хаалан иһэр. 200 миэстэлээх уопсай дьиэни тутуу өссө 2022 сыллаахха саҕаламмыта. Ол эрэн күн бүгүҥҥэ диэри эбийиэк үлэҕэ киирэ илик.

Дмитрий Садовников, СӨ бырабыыталыстыбатын бэрэссэдээтэлин бастакы солбуйааччыта: «Хомойуох иһин, улахан уларыйыыны көрбөтүбүт. Алтынньы, сэттинньи кэннэ улахан хамсааһын суох. Икки боппуруоһу үөрэтэ сылдьабыт. Ол курдук эбийиэк киирэр болдьоҕун уһатыы эбэтэр ити тутууга кыттыспыт тутуу тэрилтэлэрин барыларын куһаҕан үлэлээх бэдэрээччиттэр ахсааннарыгар киллэрии».  

Салгыы Жатайы уунан, гааһынан хааччыйар итиэннэ канализацияны ыытар биир олохтоох ситими тэрийии бырайыагын кытта билсии буолла. Манна үлэ бара турар. Сайыҥҥы кэмҥэ үгүс учаастак уулаах туран, үлэ хаамыыта атахтаммыт. Ол эрэн бэдэрээччит ыйыллыбыт болдьоххо диэри бүтэрэр сыаллаах. 

Оттон Марха бөһүөлэгэр "Үөрэҕирии" национальнай барылынан баараҕай эбийиэктэр тутуллаллар. Ол курдук, кадеттар оскуола-интэринээттэрин саҥа корпуһа итиэннэ Марха 1№-дээх орто оскуолатын салҕааһын. Манна балаһыанньа чыҥха. Кадеттар оскуолаларыгар  үлэ тэтимнээхтик барар. 120 миэстэлээх интэринээн тутуута ыытыллар.  Ол эрэн манна үлэһит ахсаанын элбэтэргэ сыал туруорулунна.

Вячеслав Нестерев, Дьокуускай куоракка СӨ сакааһынан тутуллар эбийиэктэр салалтатын салайааччыта: «Билигин тас өттүн оҥоруу бара турар. Итини сэргэ инженернэй ситими ситэри оҥоруллар. Уопсайа 45 киһи үлэлиир. Үлэһит ахсаана тиийбэт. Ону Дмитрий Дмитриевич күүһүрдэн биэрэри эттэ».

Марха 1№-дээх оскуолатын салҕааһын болдьох быһыытынан баран иһэр. 6 тыһ. кэриҥэ квадратнай миэтэрэ иэннээх 326 миэстэлээх үөрэх корпуһа эмиэ "Үөрэҕири"и национальнай бырайыак иитинэн олоххо киирэр.

«Марха 1№-дээх оскуолатыгар эбии тутуу номнуо үлэҕэ киирэн эрэр. Ол курдук эбийиэк 80% бэлэм. Үлэһиттэр билигин ис бараанын уонна таһын бүтэрэн эрэллэр. Тустаах эбийиэк ахсынньы бүтүүтэ үлэҕэ киириэҕэ», - Ирена Осипова, корреспондент.