Саха сиригэр ахсынньы ый тымныы буолуо диэн сылыктыыллар

Киһини илдьэ барыах курдук күүстээх балаһа тыал Тиксигэ түстэ. Бу Охоткай муораҕа улахан сис былыт кэлэн буурҕаны аҕалла. тыал күүһэ муҥутаан сөкүүндэҕэ 34 миэтэрэ түргэннээх бэлиэтэннэ. Айылҕа кубулҕата 3 этээстээх олорор дьиэ сарайын көтүттэ. Бу күннэргэ маннык буурҕа булуҥҥа уонна Анаабыр улуустарыгар салҕаныа. Уопсайынан быйыл Саха сиригэр сэтинньи ый олус сылаас буолла.

Бу курдук сылаас күн-дьыл туһунан устуулар социальнай ситими бу күннэргэ бараатылар. Оннооҕор кыс ортото сүүрүгүрэ сытар өрүһү Саха сирэ бүттүүнэ сөҕө - махтайа көрдө. Күнү-дьылы кэтээн көрөр сулууспа иһитиннэрэринэн, бу нэдиэлэҕэ эмиэ хаардаах-куустаах буолуо.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Бу нэдиэлэҕэ бииртэн биир атлантическэй циклоннар ааһаннар өрөспүүбүлүкэ үгүс оройуоннарыгар сылаас хаардаах күн-дьыл күүтүллэр. Салгын температурата түүнүн -28-33, арҕаа-киин оройуоннарга -21-26 кыраадыс».

Быйыл сэтинньи өрөспүүбүлүкэ бүттүүнүгэр орто кыраадыстан сылаас. Аны уһун кэмҥэ хаар түспэккэ чуолаан хотугу улуустарга үгүс күчүмүмэҕэйдэри үөскэттэ.

Үгүс сөҥүүлээх сылаас күннэр биир бастакынан куорат хаһаайыстыбатыгар үлэни эбэллэр. Манна эппиэттээх Якутдорстрой тэрилтэ түүннэри күнүстэри хаар күрдьэр, халтараан сирдэри кумаҕынан ыһар.

Айсен Баишев, "Якутдорстрой" тэрилтэ суол маастара: «Үлэбит кытаанахтык бара турар. Хаар түһэр, халтыраан утары тэрээһиннэри оҥоробут. Түүннэри күнүстэри өрөбүлэ суох 90-ча тиэхиникэ уонна 70-ча киһи үлэлиир».

Маны сэргэ сылаас күн-дьыл суолга сэрэхтээх буолууну ирдиир. Онон суол иниспиэксийэтин үлэһиттэрин хонтуруола эмиэ күүһүрэр.

Майя Местникова, СӨ ИДьМ суол судаарыстыбаннай иниспиэксийэтин салалтатын иниспиэктэрэ: «Билигин суолга халтыраан буолла. Халлааммыт күнүс сылыйар, түүнүн тоҥорор. Онон суоппардар тимир көлөҕүтүн туругун көрүнүҥ уонна куттала суох оскуораһы тутуһуоххутун наада».

Оттон күнү дьылы кэтээн көрөөччүлэр ахсынньыттан саҕалаан тымныы тыынын биллэриэ.