Дьокуускайга ГАИ инспиэктэрдэрэ маассабай бэрэбиэркэҕэ таҕыстылар

Бырааба суох уруулга олоруу түмүгүн - бу каадырдарга көрөҕүт. Бу өрөбүллэргэ суолга-иискэ куттал суох буолуутун хааччыйар инспекция үлэһиттэрин улахан хабааннаах бэрэбиэркэтэ, үгүс сокуону кэһэр суоппардары тутта. Сүрүн болҕомто докумуоҥҥа уонна суоппар туругар уурулунна.

Сахамин Христофоров, Дьокуускайдааҕы суолга куттал суох буолуутун хааччыйар иниспиэксийэтин судаарыстыбаннай иниспиэктэрэ, полиция алын лейтенана: «Күүһүрдүү буола турар, ол аата итирик уруулга олорор дьоннору булааһын, бырааба суохтары уонна светофордарга сатыы сылдьааччылары кытта үлэлиибит».

Бу күн тустаах патрульнай бөлөх Кеша Алексеев аатынан уонна Каландрашвили уулуссалар быһа хайдыһыыларыгар туран үлэлээтэ. Элбэх сырыылаах миэстэҕэ үлэ тохтоло суох барар.

Маннык оперативнай тэрээһиннэр көдьүүстээхтэрин көрдөрбүттэр, ол курдук суолга тахсар саахал көрдөрүүтэ хас да төгүл намтаабыт. Ол эрэн атын өттүгэр үрдээһин бэлиэтэнэр диэн Дьокуускайдааҕы инспекция иһитиннэрэр.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: «Сыл саҕаланыаҕыттан 3 тыһ. курдук суол саахала бэлиэтиннилэр куорат иһинэн. Онтон 500 курдук киһи араас эчэйии ыллылар, хомойуох иһин 16 киһи күн сириттэн туораабыта. Былырыыҥҥыттааҕар суол саахала кыччаата, өлүүлээх дьоннор элбээтилэр».

2008 сыллаахтан ГАИ инспекциятыгар үлэлии сылдьар Василий Чердонов урукку сыллары кытары тэҥнээтэххэ, билигин суоппардар быраабыланы тутуһаллар, тимир көлөнү ыытыы култуурата үрдээбит диэн бэлиэтиир. Маныаха аныгы үйэ тэтиминэн саҥа технологиялар киирэннэр үлэ хаамыытын чэпчэтэллэр.

Василий Чердонов, Дьокуускайдааҕы суолга куттал суох буолуутун хааччыйар иниспиэксийэтин взвод хамандыырын солбуйааччыта, полиция аҕа лейтенана: «Ориентировка кэллэҕинэ көмпүүтэринэн госномерын бэрэбиэркэлииллэр баар ду суох ду диэн».

Күүһүрдүллүбүт эрэһиим түмүгүнэн уопсайа 270 суоппар административнай эппиэтинэскэ тардыллынна. Онтон 9 киһи итирик туруктаах уруулга олорбут, 13 бырааба суох, 6 суоппар - дьону тиэйэр быраабыланы кэһиинэн тутуллубуттар. Оттон маннык бэрэбиэркэлэр тиһигин быспакка ыытыллыахтара.