Дьокуускайга "Бриллианты Якутии" муус оҥоһуктар күрэхтэрэ саҕаланна

Орджоникидзе болуоссатыгар эр киһилиин, кэрэ аҥардыын бары мууһу эрбииллэр. Бу муус скульптуратын быһыытын-таһаатын оҥорон таһаарар бастакы түһүмэх. Онтон дьэ чочуйуу үлэтэ саҕаланар. Валерий Стручков номнуо хаһыс да сылын муус абылаҥар ылларбыт. Уопуттаах скульптор үлэ ордук уустук чааһыгар киирбит. Оҥоһук кыра дэтээллэрин кыһан чочуйар.

Валерий Стручков, скульптор: «Үчүгэй ньиэрбэлээх киһи оҥорор. Быһар стаместкан сып сытыы буолуохтаах».

Валерийга үлэ бу чааһа уустук эбит буоллаҕына, кэрэ аҥардарга  бу мууһу эрбиирдээҕэр ордук судургу эбит.  Александра Неустроева уонна Людмила Федорова оҥоһуктарын тиэмэтэ Чурапчы көһөрүүтэ. Онон манна кинилэр ийэ уонна оҕо мөссүөнүн итиэннэ үрдүгэр балык фигуратын оҥорбуттар.

Александра Неустроева, скульптор: «Улахан балыкка бараллар диэн скульптура оҥоробун. Ууннан сыһыарабын, онно ыарахаттардаах буолар».

Урукку сылларга кэрэ аҥардар кытталлара сэдэх көстүү эбит буоллаҕына, быйылгы күрэххэ хас да дьахтар хамаандата баар. Атын регионтан эмиэ кэлбиттэр. Оттон уопсайа 20 хамаанда кыттар, 2 тас дойдуттан уонна 2 Арассыыйа атын субъектарыттан.

Сюн Хаян, Кытай хамаандатын чилиэнэ, скульптор "Дьокуускайга бастакыбын кэллим, ол эрэн эрдэ маннык күрэхтэргэ кытта сылдьыбытым. Муус оҥоһукпут тиэмэтэ Кыайыы көтөрө".

Бу Орджоникидзе болуоссатыгар "Саха сирин бриллианнара" диэн муус оҥоһуктар күрэхтэрин бастакы түһүмэҕэ ыытыллар. Манна кыттааччылар биир күн иһигэр биир муус скульптуратын оҥороллор. Онтон салгыы түһүмэхтэр 202 дьоҕус түөлбэҕэ баар муус куоратыгар ыытыллаллар.

Алексей Демьянов, тэрийээччи: «Иккис таһымҥа муус пааркатыгар көһөр. Бары биир күн анныгар сылдьабыт диэн темаҕа буолар 3 күннээх күрэх буолар».

Саха Сирин тыйыс тымныытын көрдөрөр биир бэлиэбит – муус уонна хаар оҥоһуктар. Маныаха бу күрэх кыһын саҕаламмытын туоһута буолар. Аны аҕыйах күнүнэн скульптордар оҥоһуктара киин куоракка кэрэ көстүү буолан туруохтара.