Уус Майаҕа икки адьырҕа кыылы бултаатылар

Уус Майа олохтоохторун аймаабыт арҕахха киирбэккэ сылдьар 3 торҕон эһэ бултанна. 14 булчуттан уонна 2 инспиэктэртэн турар суһал биригээдэ тэриллэн адьырҕа кыыллары дьаһайдылар.

Уус Майаҕа кэнники сылларга тыатааҕы мэнээктээтэ диэн элбэх иһитиннэрии киирэн турар. Түмүгэ бу. Тустаах министиэристибэ иһитиннэрэринэн бу сылга уопсайа 350 эһэни бултуурга көҥүл биэрбит, онтон  129-һа  бултаммыт. 

Егор Дьяконов, СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтин иһинэн булт уонна бултааһыны харыстааһыҥҥа департамент салайааччытын солбуйааччы: «Сайын баһаардар буолалларынан оройуоннарга эһэ күһүн хаһааныахтаах сыатын хаһааммакка туран ас көрдөөн дьоннорго тахсар эбэтэр үүтээннэри кэрийэр».

Онтон бу кыһалҕаҕа - булчут дьон атын көрүүлээхтэр. Кинилэр этэллэринэн тыатааҕы бириэмэтигэр арҕаҕар киирбэккэ мэнээктиирэ ол - күн-дьыл уларыйыытыттан тутулуктаах.

Дьон куолаһын истээт Эһэ Миисэ буу баарбын диэбиттии тахсан кэллэ. Бу Дьокуускай куоракка баар "Байанай" питомник тыатааҕыта. Манна олохсуйбута 11-с сыла.  Былырыын сэтинньи 12 күнүгэр утуйбут буоллаҕына быйыл күһүн ардахтаах уонна сылаас кыһын туран, күн бүгүҥҥээнни диэри сэргэх, хаама сылдьар.

Юрий Борисов, “Байанай” булчут ыттары тутар киин салайааччыта: «Алтынньы бүтүүтэ сытааччы, былырыын сэтинньи 12 сыппыта. Быйыл 20 чыыһыла, эһэбит сыппакка сылдьар. Аһаппатахпыт ый буолла, кэлэн ааны сабаары гыннахха туран кэлэр. Быйыл наһаа сылаас күһүн буолан турар».

Онтон бу Мииринэй паарката. Тыатааҕы күн бүгүҥҥэ диэри эмиэ арҕаҕар киирэ илик. Хата, ыксала-титэлэ суох утуйар усулуобуйатын отунан оҥостор түбүгэр сылдьар.

Учуонайдар этэллэринэн сыл ахсын тыатааҕы ахсаана улаата турар. Ордук соҕуруулуу-арҕаа балаһыанньа уустугурар. Үксэ кырдьаҕас, эбэтэр улахан эчэйиилээх адьырҕа маннык сылдьар. Эбэтэр  утуйа сытар тыатааҕыны булчуттар, мас кэрдээччилэр уһугуннарбыт буолуохтарын сөп.

Николай Мамаев, криолитозона биологическай кыһалҕаларын институтун научнай үлэһитэ: «Бүтэһик көрдөрүүлэринэн, холобур, Сунтаар улууһугар 25 саастааҕы тутан үөрэппиппит. Улахан эчэйиилээх этэ, ол иһин сүгүн аһаабакка уонна кырдьан адьырҕатыйбыт».

Уус Майаҕа бултаммыт тыатааҕылар сотору кэминэн Дьокуускайга кэлиэхтээхтэр. Манна иснтутитут үлэһиттэрэ төбөлөрүн, эттэрин,  тиистэригэр тиийэ чинчийиини ыытыахтара уонна дьэ түмүк таһаарыахтара.