Национальнай библиотека оҥоһуу өйү туһанар бырайыагы олоххо киллэрэр

Оҥоһуу өй хайа баҕар тиэкиһи сахалыы дорҕоонноохтук ааҕар. Соторутааҕыта национальнай бибилэтиэкэ искусственнай интеллект таҥыытын түмүктээн үлэҕэ киллэрдэ. Итиэннэ сайдыы тэтимин дойду бибилэтиэкэлэриттэн биир бастакынан туһанар. Бырайыак биэс хайысханы хабар.

Борисов Василий, СӨ национальнай библиотека салайааччытын солбуйааччы: «Бу бибилэтиэкэ үлэтин барытын төһө кыалларынан элбэх хайысханы оҥоһуу өй быһыытынан оҥоро сатыыбыт. Сыыппараҕа көһөрүллүбүт кинигэлэри барыларыттан булан таһаарар. Кинигэлэри эрэ буолбакка, сонуннары, быыстапкалары, 3D оҥоһуктары, аудио, видео буоллун, ыйыппыккытын барытын таһаарар».

Оҥоһуу өй киһиттэн туох даҕаны уратыта суох саҥарарын, туох баар дорҕооннору сөптөөхтүк туттарын ситиһэргэ дьиҥнээх киһи саҥатын холобур оҥостор. Күн бүгүн 16 тыһыынча куолас хомуллубут. Мантан 11 бэрэбиэркэлэммит.

Хас биирдии куолас оҥоһуу өй чочулларыгар, сайдарыгар төһүү күүс буолар. Оттон саҥа сүүрээни биир бастакынан устудьуоннар туһаналллар. Кинилэр сүрүннээн электроннай бибилэтиэкэри итиэннэ конспект оҥорор хайысханы туһаналлар. Слава Черкашин электроннай библиотекэри кытта бырайыагар туһаныахтаах кинигэлэрин талар.

Слава Черкашин, ааҕааччы: «Сыыппара бибилэтиэкэни соторутааҕыта билбитим. Наһаа үчүгэй, үөрэхпэр көмөлөстө. Уонна хантан баҕар туох баҕар кинигэлэри булабын».

Оҥоһуу өй маны сэргэ бибилэтиэкэ ис үлэтигэр улахан суолталаах көмөнү оҥорор буолла. Эрдэ үлэһит биир каталогы хомуйууга 40-50 мүнүүтэни барыыр буоллаҕына билигин робот биир эрэ мүнүүтэ иһигэр оҥорон таһаарар.

Яна Чыбыева, СӨ национальнай библиотека иһитиннэриинэн хааччыйыы киинин сэбиэдиссэйэ: «Үлэбитин олус чэпчэттэ. Каталогизатор ол запиһи эбэр. Онно бириэмэтэ барар – 10-15 мүн. буолар».

Маны сэргэ Саха сирин энциклопедиятыттан туһааннаах иһитиннэриини таҥан таһаарыыга оҥоһуу өйү туһаныы салаата эмиэ үлэлээн саҕалаата. Инникитин бу хайысхалар бары толору олохтоох омуктар тылларынан саҥаралларын ситиһиллиэхтээх.