2025 сылтан "Земский работник культуры" диэн национальнай тосхол олоххо киирэр

Сунтаар улууһуттан сылдьар Эдуард Тихонов быйыл бүтэһик куурус, төрүт култуура салаатын аны саас бүтэриэхтээх. Билиҥҥэттэн номнуо дипломнай үлэлэрин бэлэмниир түбүгэр сылдьаллар, ол курдук икки айымньынан испиктээкил туруоруохтаахтар. Эдуард үөрэҕин бүтэрэн баран төрөөбүт нэһилиэгэр баран үлэлиир соруктаах.

Эдуард Тихонов, төрүт култуура салаатын 4 кууруһун устудьуона: «Бэйэм баҕаран туран бу идэни талбытым. Мин эбээм уонна ийэм бу салааннан барбыттара. Сунтаар улууһугар идэбинэн үлэлии бараары сылдьабын».

Дьокуускайдааҕы култуура уонна искусство коллеһыгар бүгүҥҥү күҥҥэ 274 устудьуон үөрэнэ сылдьар. Кинилэртэн аны саас күнүскү салааны 60, оттон кэтэхтэн 40 оҕо бүтэрэн орто үөрэхтээх култуура эйгэтин исписэлииһин аатын сүгүөхтэрэ.

Захар Никитин, култуура уонна искусство коллеһын дириэктэрэ: «Ол гынан баран 100 оҕо биһиги өрөспүүбүлүкэбитигэр култуура эйгэтигэр олох аҕыйах буолар. 9 кылаас кэннэ киирэллэр оҕолор. Уол аймах армияҕа барар уонна салгыы үрдүк үөрэххэ эмиэ киирэллэрэ баар».

Ити курдук бүгүҥҥү күҥҥэ тыа сиригэр кулууптарга, искусство оскуоларыгар, музейдарга, библиотекаларга үлэһиттэр тиийбэттэрэ сүрүн кыһалҕа. Каадыр дефицитэ киэҥник бэлиэтэнэр. Холобура, колледж үөрэтэр звукооператорское мастерство диэн идэни баһылаабыт ыччат номнуо үөрэхтэрин бүтэрэ иликтэриттэн үлэ булуна охсор.

Станислав Олесов, музыка, звукооператор уонна эстрада ырыатын салаатын бэрэссэдээтэлэ: «Бу эйгэҕэ исписэлиис тиийбэт. Биһи оҕолорбут 4 кууруска номнуо үлэлэрин булаллар».

Маныаха эдэр испиэлиистэри, саҥа үөрэхтэрин бүтэрбиттэри өйүүр сыаллаах дойду Бэрэссэдьиэнин туһаайыытынан кэлэр 2025 сылтан “Земский работник культуры” диэн бырагыраама олоххо киириэхтээх. Оччотугар 5 сылтан итэҕэһэ суох дуогабар баттаһан тыа сиригэр үлэлии бардаххына 2 мөлүйүөҥҥэ тиийэ көмө харчы ылар кыах үөскүүр. Коллежка бу бырагыраама киирэригэр ааспыт сылтан ыла бэлэмнэнэн үлэ ыыталлар.

Захар Никитин, култуура уонна искусство коллеһын дириэктэрэ: «Оҕолор ити бырагыраамаҕа кыттыһан хоту улуустарга бардахатрына, онно каадырынан хааччыйыы тупсуоҕа».

Онон саҥа тосхол култуура исписэлиистэрэ тыа сиригэр үлэлии баралларыгар дьоһун көмөлөөх буолара күүтүллэр.