"Звездный" дьоҕус түөлбэни тутуу тэтимнээхтик барар

Киэҥ-куоҥ, сылаас дьиэ-уот. Өлөөн улууһуттан сылдьар Антонина Васильевна Алексеева эрин кытта быйыл саҥа дьиэҕэ көстүлэр. Аҕам саастаахтар бу аҕыйах сыл бэттэх хотуттан киин куоракка көһөн кэлбиттэр. Өлөөннөөҕү дьиэлэрэ хаарбах туруктааҕынан биллэриллэн, бу Дьокуускайга дьиэ биэрбиттэр. Саҥа кыбартыыраларын күлүүһүн ааспыт сылга ылан, номнуо нус бааччы олороллор.

Антонина Алексеева, "Звёздный" дьоҕус түөлбэ олохтооҕо: "Сааһыра барбыт дьон буолан доруобуйабытын көрдөрүнэрбит, көннөрөрбүт элбэх. Ол аайы куоракка кэлэн иһээччибит. Бырайыаспыт ыарахан. Онон дэлби үөрдүбүт. Талларбыттара, ону манна талбыппыт. Уонна бэлэм дьиэҕэ киирдибит".

Манна даҕатан эттэххэ, бу хаарбах туруктаах дьиэттэн көһөрүү бырагыраамманан кыбартыыра ылбыттарга тутааччы тэрилтэ өрөмүөннээх бэлэм дьиэни туттарар. Онон олохтоохтор миэбэл, тиэхиньикэ эрэ ылыналлар. Бу С секторга быйыл хаарбах туруктаах дьиэттэн 300-чэ киһи көһөн  олорор усулуобуйата тубуста.

Софья Максимова, СӨ тутуу министиэристибэтин тутууга уонна олох-дьаһах бэлиитикэтигэр департаменын салайааччыта: "17 кыбаартал уонна аэропорт оройуонун хаарбах дьиэлэриттэн көһөрүү бара турар. Билиҥҥи туругунан 60 киһиэхэ күлүүс бэрилиннэ".

Элбэх кыбартыыралаах дьиэлэри таһынан манна социальнай эбийиэктэри тутуу барар. Ол курдук, 315-тии миэстэлээх 2 оҕо уһуйаана, 990-ннуу үөрэнээччини батарар икки оскуола, поликлиника уонна олохтоохтор сынньалаҥнарын тэрийэр сыаллаах баараҕай спорт эбийиэгэ тутуллар. Манна хаҥкылыыр былаһаакка, эрчиллэр саала баар буолуоҕа. Эбийиэги номнуо бу сыл бүтүөр диэри туттарыахтаахтар. 

Арчылаан Хамаров, бэдэрээччит: "Билигин тас үлэ бүтэн турар. Ис бараанын оҥоруу барар. Бу мин муус кутуллуохтаах сиригэр турабын. Турбата барыта тардылынна. Оборуудабанньа барыта турда. Билигин бетон кутуутун саҕалыахпыт".

"Звездный" дьоҕус түөлбэҕэ дьоҥҥо бары усулуобуйа олохтонор. Халлаан тымныйан дьиэ иһинээҕи үлэлэргэ киириэхтэрэ. Оттон сылыйдаҕына олбуордары көҕөрдүү, тупсарыы үлэлэрэ ыытыллыахтара.

Онон билигин олохтоохтор дьиэлэрин таһыттан тохтобултан сылдьаллар. Оттон кыбаарталы быһа холоон 2028 сылга барытын тутан бүтэриэхтээхтэр. Оччотугар 11 тыһ тахса киһи манна олохсуйуохтаах.