"Саха сирин 100 бастыҥ табаара" диэн куонкурус кыайыылаахтарын наҕараадалаатылар

Туораахтаах култууратынан аатырар Амма улууһугар эдэр урбаанньыт Майя Олесова сиир бурдугу оҥорон таһаарыыга ылсыбыт. Уонна быйыл "100 бастыҥ бородууксуйа" күрэҕэр кыттан кыайыылаах үрдүк аатын сүктэ. Быыстапкаҕа бэйэ бородууксуйатын илдьэ кэлбит. Кини бу быйыл Аммаҕа буолбут олоҥхо ыһыаҕар бэйэ оҥоруутун киэҥ араҥаҕа билиһиннэрбит.

Майя Олесова, урбаанньыт: "Олус диэн дьор сэргээтэ, сөбүлээтэ. Олус үлэлээх, боростуой буолбатах. Элбэх саҥа толкуйдар бааллар. Инниктин барытыгар кыттан иһэргэ бэлэммит".

Оттон Хатас агро-оскуолатын бородууксуйата номнуо бүтүн өрөспүүбүлүкэҕэ биллэр. Бакыаттаах морстарын, балык мииннэрин үгүс маҕаһыыҥҥа көрүөххэ сөп. Оскуола буоларын быһыытынан сүрүн уратылара, кинилэр үөрэнээччилэрин урбаан эйгэтигэр сыһыараллар. Онон бородууксуйаны оҥорон таһаарыыга оҕолор көхтөөх кыттыыны ылаллар. 

Николай Слепцов, П.Н. уонна Н.Е.Самсоновтар ааттарынан Хатастааҕы агро хайысхалаах оскуола дириэктэрэ: "Оҕолорбут араас элбэх бырайыактары оҥороллор. Ону олоххо киллэрэргэ анаан тэрилтэ тэрийбиппит. Собобут миинэ 100 бастыҥ табаарга киирбититтэн олус диэн үөрэн турабыт".

Тустаах агро оскуола быйылгыттан анал байыаннай дьайыыга бэйэ бородууксуйатын ыытар. Номнуо 20 тахса тыһыынчаны байыастарга көмө быһыытынан ыыппыттара. Уонна үрдүк сыанабылы ылбыттара. Онон кэлэр да сылга бу үтүө үгэстэрин салгыыр былааннаахтар. Оттон тустаах куонкурус ас бородууксуйатыгар, нэһилиэнньэҕэ анаан оҥоһуллар бырамыысыланнай табаардарга уонна норуот уус-уран оҥоһуктарыгар, араас өҥөнү оҥорууга туһаайылынна.

Лилия Золотарёва, СӨ атыы-эргиэн, туризм министиэристибэтин атыыга салаатын салайааччыта: "быйыл Россия үрдүнэн 8 лауреат, 14 дипломан баар. Бу куонкуруспут сыл аайы буолар. Бастаан улууска, онтон өрөспүүбүлүкэҕэ. Бу кэннэ Россияҕа кытталлар".

Тэрийээччилэр бэлиэтииллэринэн, сыллата кыттааччы ахсаана кэҥиир. Маны тэҥэ бэйэ оҥорон таһаарыы хаачыстыбата үрдүүр. Оттон тустаах күрэх биир сүрүн сыалынан олохтоох бородууксуйаны өрөспүүбүлүкэ иһигэр эрэ буолбакка тас ырыынакка таһааран Сахабыт сирин брендин суолтатын үрдэтии уонна сайыннарыы буолар.