Саха төрүт спорт көрүҥнэрин киэҥ араҥаҕа тарҕатыы

Дьааҥы Табалааҕыттан төрүттээх, 2-ис баһаарынай чаас тутаах үлэһитэ Петр Прудецкай аан бастакытын 4 төгүлүн ыытыллар ыксаллаах быһыы -майгы министиэристибэтин ыытар күрэҕэр кыттыыны ылар. Бииргэ үлэлиир-алтыһар кэллиэгэлэрин кытары бүгүн кини илин-кэлин түсүһэр. Уопсай түмүккэ күүстээхтэр кэккэлэригэр сылдьар.

Пётр Прудецкий, күрэх кыттыылааҕа: «Быйыл бастакыбын кытта сылдьабын.  Ый иһигэр дьарыктаммытым».

"Өрөгөй" спорт киинигэр 4 төгүлүн ыытыллар төрүт оонньууларбытыгар курэх, тустаах министиэристибэ саамай сымсаларын, быһыйдарын, быыппастыгас былчыҥнаахтарын түмтэ. Манна үксүн Дыгын оонньуутун ааттаах-суоллаах спортсменнара кыттыыны ылаллар. Онтон кинилэр бары кэриэтэ ыксаллаах быһыы-майгы министиэристибэтин тутаах үлэһиттэрэ.

Пётр Пестряков, ЫБММ СӨ салалтатын 4-с №-дээх баһаарынай чааһын 5-с быыһыыр баһаарынай этэрээтин салайааччыта: «Бэйэм баҕабынан ыытабын. Номнуо төрдүһүн ыытыллар. Быйыл ким кыайарын көрүөхпүт, тэҥ уолаттар. Үчүгэй киирсии буолуо».

Күрэх "Үс төгүл үс" ыстаныыттан саҕаланна, манна Борис Строев иннин кимиэхэ да биэрбэтэ. Салгыы саамай уустук түһүмэх тутум эргиирэ, онтон мас тардыһыы, сахалыы оҕунан ытыы көрүҥнэрэ ыытыллынныллар. Оххо Алексей Созонов саамай сытыы харахтааҕынан ааҕыллынна.

Иван Яковлев, күрэх судьуйата: «А, Б бөлөхтөргө араарабыт. Б бөлөххө түспүт 3 миэстэни былдьаһар».

Төрүт оонньууларга күрэх Саха сирин бу көрүҥҥэ федерациятын кытары биир сөбүлэҥинэн ыытыллар. Халанадаарнай былааҥҥа киирэн турар.

Михаил Друзьянов, СӨ саха төрүт спорт көрүҥнэригэр федерациятын вице-президенэ: «Бу көрүҥ Саха сиригэр сайдан эрэр. Быйыл бастакы улахан старт буолар».

Оттон маннык күрэх биллэн туран байыастарга улахан уопут, үөрүйэхтэрин чочуйар тэрээһин буолар. Эһиил үбүлүөйдээх 5 төгүлэ ыытыллара күүтүллэр.