Саха сиригэр ыччат каадырын киинэ үлэлиир

Айкона Матвеева былырыын Хотугулуу-Илин федеральнай университет математика-информатика институтун бүтэрбитэ. Декретын кэниттэн дьарыктаах буолуу киинигэр үлэтэ суоҕунан учуокка турбут. Ыччакка аналлаах үлэ дьаарбаҥката буоларын истэн кэлбит.

Айкона Матвеева, үлэ көрдөнөөччү: «Системнай администратор, программист 1С диэбит курдук көрдүүбүн».

Саха сиригэр сыл саҥатыттан дьарыктаах буолуу кииннэригэр уопсайа 4 аҥар тыһыынча кэриҥэ ыччат үлэ көрдөммүт. Бүгүҥҥү күҥҥэ үөрэҕи бүтэрбиттэр ахсааннарыттан аҥардара бэйэтин идэтинэн үлэлээбэт. Маныаха баар балаһыанньаны көннөрөр, итиэннэ эдэр дьон үлэ булуналларыгар көмөлөһөр сыаллаах ыччаты үлэнэн хаачыйар Киин бу алтынньы ый бүтүтэ аһыллыбыта.

Айтал Керемясов, СӨ ыччатын үлэнэн хааччыйар киинин салайааччы: «Манна үөрэх эрэ кыһаларын кытта буолбакка. Ыччаты уонна үлэ биэрээччилэри кытта тэҥҥэ ыкса үлэлиэхтээхпит. Биһи кииммит кинилэри холбуур муоста буолуохтаах».

Саҥа киин биир бастакы бөдөҥ тэрэһининэн бу үлэ дьаарбаҥката буолла. Манна чуолаан промышленнай эрэ тэрилтэлэр кытталлар. Барыта 15 тэрилтэ сүүстэн тахса вакансияны туруорда.

Надежда Иванова, "Саха сирин тимир суоллара" тэрилтэ каадыры бэлэмнииргэ инженерэ: «Аллараа Бэстээх ыстаансыйатыгар “составитель поездов” диэҥҥэ үс киһи наада. Манна 90-110 тыһ. дылы хамнастаахтар».

Дьокуускай үрдүнэн сыл саҕаланыаҕыттан 1402 35-гэр диэри саастаах эдэр дьон үлэ көрдөөбүт. Олортон 639 киһи үлэтэ суоҕунан учуокка турда. Кинилэр үксүлэрэ үрдүк уонна орто үөрэхтээх исписэлиистэр, педаготар, инженердэр, экономистар, менеджердар.

Иванна Аргунова, Дьокуускайдаҕы нэһилиэнньэ дьарыктаах буолуутун киинин үлэтэ суохтары кытта үлэлэһэр салаатын салайааччы: «Биһиги сулууспабыт профориентация, психологическэй көмө уонна социальнай адаптация судаарыстыбынай өҥөнү биэрэр. Бу сыл саҕаланыаҕыттан уопсайа кылгас куурустарга уопсайа 45 эдэр ыччат үөрэннэ».

Үлэ дьаарбаҥкатыгар 600-чэкэ кэриҥэ устудьуон, эдэр исписэлиис кытынна. Кинилэр ваканасиялар  тустарынан эрэ буолбакка, туһааннаах консультация, маастар-кылаас эмиэ ыллылар.

Валерий Киприянов, информационнай технология коллеһын устудьуона: «Манна юристары көрдүүллэр эбит. Чуолаан кэпсииллэр. Гынан баран мин МВД бараары сылдьабын».

Маннык тэрээһин ый аайы араас салаалары хабан ыытыллара күүтүллэр.