Саха сиригэр сокуону кэһии түбэлтэлэрэ аҕыйаабыта бэлиэтэнэр

Улахан итирик туруктаах дьон, уопсастыбыннай бэрээдэги кэһэллэр диэн иһитиннэрии киирэн, Дьокуускайдааҕы патрульно-постовой сулууспа үлэһиттэрэ тутатына ыйыллыбыт аадырыска тиийэллэр. Киин куорат автовокзалын сылаас тохтобулуттан бэрээдэги кэһээччини наркологическай балыыһаҕа илдьэллэр.

Бу курдук күннэтэ, түүннэри-күнүстэри, тохтобула суох Дьокуускайдааҕы, норуокка этиллэринии ППС үлэһиттэрэ Дьокуускай куорат бэрээдэгин көрөллөр. Статистика чахчыта көрдөрөрүнэн кэлиҥҥи кэмҥэ, бу эйгэҕэ, чуолаан: уоруу, дьону халааһын, кырбааһын, бэрээдэги кэһии аҕыйаабыта бэлиэтэнэр. Оттон бу биллэн туран, ис дьыла уорганнарын көдьүүстээх үлэлэрин түмүгэ.

Хас күн аайы полиция үлэһиттэрэ сулууспаҕа тахсыахтарын иннинэ, салалтаттан инструктаж ылаллар. Үлэлэрин сыалын-соругун, оперативнай балаһыанньаны кытары билсэллэр, ханнык адырыска буруй-кэһии тахсыбытын барытын суруналлар. Салгыы хайаан даҕаны, тус туттар маллара, саадахтара бэрэбиэркэлэнэр.

Евгений Ачикасов, Дьокуускай куорат патрульнай-постовой сулууспатын мобильнай бөлөҕүн хамандыыра: «Дьокуускай куорат уопсастыбыннай сирдэригэр бэрээдэги көрөбүт, ону таһынан дьоҥҥо көмө наада буоллаҕына биһи сулууспабыт тутатына бастакынан тиийэр. Куорат олохтоохторун кытта үлэ ыытаммыт уонна социальнай ситимнэри көрөммүт ханна өссө биһи үлэһиттэрбит наадаларын билэн эбии нарядтары ыытабыт».

Бу эрэ кэнниттэн полиция үлэһиттэрэ сулууспаларыгар тахсаллар. Хас биирдии бөлөхтөр тимир көлөлөрүгэр олороот, бэйэлэрин маршруттарынан айанныыллар. Биһиги устар бөлөхпүт, үлэни иһиттэн көрөр соруктаах айаннаан иһэн, биллибэт киһи сытарын туһунан иһитиннэрии киирбит аадырыһыгар көтүтэбит. Тиийээт да көрдөөһүн саҕаланар.

Анатолий Сивцев, Дьокуускай куорат патрульнай-постовой сулууспатын мобильнай бөлөҕүн иниспиэктэрэ, полиция лейтенана: «Итирик киһи сытар диэн ыҥырдылар.  Кэлэн хас подъезд аайы киирэн көрдүбүт, чугастыы сирдэри барытын көрдүбүт уонна булбатыбыт. Ол иһин рапорт суруйа олоробун».

Бу курдук, биир ППС бөлөҕөр  10-тан тахса суһал иһитиннэрии киирэр эбит буоллаҕына, взводка күҥҥэ 50-60 иһитиннэрии киирэр.

Игорь Ефремов, ИДьМ Дьокуускай куораттааҕы салалтатын салайааччытын солбуйааччы, полиция начальнига, полиция полковнига: «Раскрытиебыт быйыл буоллаҕына 53,6%. Ити аата буруйдар улахан аҥаара арыллыбыт диэн буолар. Үксүн буруй оҥорооһуна дьону албыннааһын буолар. Уулуссаҕа уонна уопсастыбыннай миэстэҕэ буруй оҥорооһуна лаппы кыччаан турар».

Манна даҕатан эттэххэ, ис дьыала уораганнарын үлэһиттэрэ Саха сирин олохтоохторун мобильнай түөкүттэртэн сэрэхтээх буоларгытыгар ыҥырар.