Ил Дархан кубогар Eagle FC лигатын күрэҕэ ыытыллынна

Таатта уонна Мэҥэ Ханалас спортсменнара Eagle ММА лигатын курэҕин арыйар чиэскэ тигистилэр. Маннык улахан таһымнаах тэрээһиҥҥэ, бастакынан киирсэр улахан эппиэтинэс. Уолаттар туох баар кыахтарын ууран туран, тыҥааһыннаах киирсиини көрдөрдүлэр. Бары раунд түмүгүнэн Таатта Борбулуттан сылдьар Егор Захаров кыайыыны ситистэ.

Егор Захаров, күрэх кыайыылааҕа: «Былааммытын толордубут. Стойкабын сайыннарыахпын наада эбит. Тустуунан, хонтуруолунан кыайдыбыт».

Иккис төгүлүн "Өрөгөй" спорт киинигэр Ил Дархан кубогар Eagle ММА лигатын күрэҕэ ыытыллынна. Бу ааттаах-суоллаах күрэхтэһиигэ кытта Иран, Египет, Индия, Афганистан, Узбекистан уонна Арассыыйа регионнарыттан ММА көрүҥүн өрө туппут, кыахтаах  уолаттар кэллиллэр. Маныаха биһиги Өрөспүүбүлүкэбит спортсменнара эмиэ кыттыыны ыллылар.

Иван Охлопков, күрэҕи тэрийээччи: «Номнуо үөрэнээччилэрим Григорий Барашков, Егор Захаров, Петр Уваров, Алексей Пасторов, Василий Григорьев уонна Гавриил Семенов эмиэ Саха сирин биир күүстээх байыаһа. Хомойуох иһин Денис Андреев сопернига травмаланан хаалбыта».

Eagle FC лиганы, 2020 сыллаахха, UFC-га хотторуу диэни билбэтэх, атыырбыт спортсмеммыт Хабиб Нурмагомедов тэрийбитэ. Ол кэмтэн ыла тустаах лига 42 улахан күрэҕи тэрийэн ыытта. Онтон иккитэ Саха сиригэр. Бу күн бочуоттаах ыалдьытынан, эмиэ биир биллэр UFC, билигин киирсэ сылдьар байыаһа Умар Нурмагомедов кэлэн киирсиилэри сыаналаата.

Умар Нурмагомедов, бочуоттаах ыалдьыт: «Встретили, очень вкусно накормили. Все отлично, спасибо большое. Здесь борьба на очень высоком уровне. Сегодня они продемонстрируют насколько они готовы к смешанным единоборствам».

Чахчы, спорду өрө туппут Өрөспүүбүлүкэ баарын биллэрдэ. Бу күн биһиги 4 уолбут кыайыы көтөллөөх дьиэлээтилэр Гавриил Семенов саамай түргэн киирсиини 1 мүн. 47 сөкүүндэнэн Узбекистантан сылдьар утарсааччытын кыайда.

Гавриил Семёнов, күрэх кыайыылааҕа: «Соперникпытын биир ый аннараа өттүгэр билбиппит стойкаҕа үчүгэйдик киирсэр диэн. Ол иһин тустан киирэн партерга элбэхтик үлэлиир былааннаах этибит».

Биһиги спортсмеммыт Алексей Пасторов эмиэ кыайыыны ситистэ. Eagle кулууп салаайааччыта бэлиэтээбитинэн биһиги бөҕөспүт саамай тыҥааһыннаах, киһи соһуйар киирсиитин көрдөрбүт.

Онтон дьэ, саамай кэтэһиилээх, титульнай киирсии саҕаланар. Биһиги спортсмеммыт, Чурапчы уола Григорий Барашков Афганистантан сылдьар Азим Мохлиһы кытары күөн көрсөр. Бастакы түһүмэх 2-ис мүнүүтэтигэр биһиги уолбут техническай нокаутунан утарсааччытын кыайар.

Григорий Барашков, күрэх кыайыылааҕа: «Биир ый иһигэр үчүгэйдик бэлэмнэннибит ол иһин этэҥҥэ ааста онон биир дойдулаахтарбытыгар кыайыыны аҕаллыбыт».

Күрэх бу спорт көрүҥүн сэҥээрээччилэрин олус үөртэ, үрдүк таһымнаахтык ааста. Эһиил эмиэ киин куоракка бу лига күрэҕэ ыытыллара былааннанар.