Уулаах Ааҥҥа муҥха таттылар

Муҥхаҕа киириэх иннинэ олохтоохтор үгэс быһыытынан уот оттон арылаах алаадьынан сирдэрин күндүлүүллэр, Баай Байанайтан көрдөһөллөр.

Дьэ бу кэнниттэн эбэҕэ киирдилэр. Муҥхалыыр күөл Дьулаан диэн ураты кэрэ сиргэ мыраан анныгар  сытар. Дэриэбинэттэн чугас буолан үгүс киһи муһунна, эдэриттэн эмэнигэр тиийэ. Оттон муҥханы иилээн-саҕалаан Степан Кириллович Ноев ыытар. Хас биирдии киһиэхэ эбээһинэһин чопчу этэр, үлэни салайар.

Степан Ноев, Уулаах Аан нэһилиэгин олохтооҕо: "Чагдаат алларан баран муҥхабытын түһэриэхпит, бэчимэбитин баайан бэлэмнээн бараммыт. Дьэ уонна бэлэм ойбоннор устун баран иһиэхпит".

Балыксыттар 2 кынакка арахсан үтүмэҕи бэчимэ быаҕа баайан муус аннынан ыыппытынан бардылар. Муҥха уһуна  миэтэрэ. Манна саамай сүрүнэ муҥха иэнин, уһунун сөпкө учуоттаан түһэрии. Уопсайа иккитэ түһэриэхтэрэ.

"Муҥхаҕа кэлбит хас биирдии киһи туспа эбээһинэстээх. Холобур, мин балык үргүтэ турабын", Ирена Осипова, корреспондент.

Нырыынан балыктары үргүтүүгэ сүрүннээн дьахталлар уонна оҕолор тураллар. Арсен Сысоев аан бастакытын нырыыны илиитигэр тутта, кини бу бастакы муҥхата. Оттон доҕоро Мирсен Саввин номнуо иккис сырыыта. Уолаттар каникулбут бүтэһик күннэрин туһалаахтык атаара сылдьалларын үллэстэллэр.

Кыһыҥҥы бырааһынньыкка 50-чэ киһи муһунна. Биирдиилээн киһини таһынан бүтүн дьиэ кэргэнинэн кытта бааллар. Аҕам саастаахтар ыччаттарга, оҕолорго үтүө үгэһи салгыылларыгар бэйэ уопуттарын үллэстэллэр, үөрэтэллэр-такайаллар. Маныаха сыллата эдэр дьон ахсаана элбиирэ үөрдэр.

Захар Григорьев, Уулаах Аан нэһилиэгин олохтооҕо: "Быйыл ыччат кэлиитэ элбэх. Урукку да дьылларга үгүс буолаллара. Мин манна кэлэн дьоммун-сэргэбин көрсөбүн, хааман-сиимэн аралдьыйабын. Сүрүнэ биһигини көрөн эдэр ыччаттар үөрэнэллэр".

Муҥха түспүтэ чаастан ордук ааста. Эр дьон аа-дьуо тардан саҕалаатылар.

Саамай күүтүүлээх түгэн тосхойдо. Күөх Боллох мичик гынан, Баай Байанай балыксыттары күндүлээтэ.

Муҥха тахсан бүппүтүн кэннэ кэтэһиилээх үллэстии саҕаланна. Ол курдук бастаан таастааччыларга ирээттээтилэр. Дьэ, онтон бары бүгүҥҥү күн кыттыыылаахтарыгар.