Саха сиригэр аан бастакытын сиртэн салайыллар ааллар бэстибээллэрэ саҕаланна

Николай Петров бастакы дронун 2015 сыллаахха атыыласпыт, онтон ыла киинэ уонна телевидение эйгэтигэр туһанар буолбут. Сиртэн салайыллар көтөр аал хайысхата, туһата элбэх. Киһи тиийбэт сириттэн уһулуохха сөп диэн кэпсиир.

Николай Петров, бэстибээл кыттааччыта: «Дьоннор хайдах тутталларын билбэттэр. Билигин кэлэн соһуйдулар аҕай, FPV дроҥҥа мин камера кэтэрдэн уһуларбын. Онтон кадрын көрөн бараннар манныгы киинэҕэ киллэриэхпит диэн этэллэр. Саха киинэлэригэр дрон баар буоллаҕына сүрүнэ ол мин кадрдарым буолаллар».

Валентин Макаров дронунан дьарыктаммыта икки сыл буолбут. Тэрилтэтигэр сэттэ киһи үлэлиир. Кини бастаан саҕалыырыгар дрону тыа хаһаайыстыбатны эйгэтигэр туһанар буоллаҕына, быйылгыттан кэнээн, элбэх хайысханы хабан үлэлэтэр былааннаах.

Валентин Макаров, бэстибээл кыттааччыта: «Биһи эрэгийиэммитигэр сөптөөх дроннары оҥоро сылдьабыт. Бу уотунан барар сельхоз дрон, 20 лиитэрэни көтөҕөр, 15 мүнүүтэ көтөр уонна 15-20 гектары ыһар».

Бэстибээл бастакы күнүгэр устудьуоннар, оскуола оҕолоро көхтөөх кыттыыны ыллылар.  Үөрэх кыһалара кылааһынан, бөлөҕүнэн тиийэ кытта кэлбиттэр. Ордук маастар-кылаастары сэҥээрдилэр. Маннык саҥа сүүрээннэх тэрээһиннэр сайдыыны киллэрэллэр, оҕолор элбэххэ, саҥаҕа үөрэнэллэр диэн учууталлар этэллэр.

Анна Давыдова, Дьокуускайдааҕы "Айар Уустар" колледжын педагога: «Бэстибээл интириэһинэй, оҕолор сөбүлээтилэр. Маннык элбэх оҥоһуктары, саҥа сүүрээннэри көрөр интириэһинэй. Оҕолор сайдалларыгар наадалаах дии саныыбын».

Маны таһынан бэстибээл чэрчитинэн дроннар күрэхтэһиилэригэр Өрөспүүбүлүкэтээҕи чемпионат ыытыллыаҕа, манна кыайбыттар  бэдэрээлинэй күрэхтэһиигэ барар кыахтаныахтара.