Хатас агро хайысхалаах оскуолата сыллата саҥаттан саҥа бородууксуйаны оҥорон таһаарар

Хос иһэ кучу от уонна дөлүһүөн дыргыл сытынан туолар. Үөрэнээччилэр ким хаалыыр, ким этикиэккэ сыһыарар. Биирдии сууга уоннуу чэй угуллар. Саха сирин маанылаах отторун сыта, амтана уларыйбатын диэн анал сыалгын киирбэт хаатыгар угаллар. Бу оҕолор хас биирдиилэрэ тус туһунан бэйэлэрэ бырайыактаахтар. Холобура, 8 кылаас үөрэнэччитэ Айаал Прокопьев пакеттаммыт ис миинэ оҥорор.

Айаал Прокопьев, Хатас орто оскуолатын 8 кылааһын үөрэнээччитэ: «Биһи бу бырайыагынан 3 сыл дьарыктанабыт. Быйыл Москваҕа “Золотая осень” диэҥҥэ кыттыбыппыт уонна боруонса мэтээл ылбыппыт».

Саҥа бырайыак үрдүк сыанабылтан саҕаланна. Айаал кылааһынньыгын Миладаны кытта аан бастаан оскуола иһинээҕи научнай конференцияҕа кыттыбыттара. Онтон салгыы сайыннаран, оскуола туһааннаах докумуону оҥорон, быйыл ситиһии кэллэ итиэннэ сотору кэминэн атыыга таһаарыахтара.

Милада Николаева, Хатас орто оскуолатын 8 кылааһын үөрэнээччитэ: «Сахалыы ис мииниттэн ууга суураллар пюре-миин гыммыппыт».

"Көмүс күһүн" быыстапкаттан Хатас оскуолата быйыл 5 мэтээли аҕалла. Сыл аайы саҥаттан саҥа арыйыылары кытыннараллар. Ол курдук быйыл үрдүк сыанабылы Саха сирин араас үүнээйилэриттэн оҥоһуллубут эбииликтэр ыллылар. 10 кылаас үөрэнээччитэ дьаҥтан харыстыыр биэ эмийэ, сугун уонна уулаах отон састааптаах утаҕы оҥорор.

Люба Окорокова, Хатас орто оскуолатын 10 кылааһын үөрэнээччитэ: «Үс көрүҥнээх: вирус утары, чэбдик уонна таежнай диэн. Маны итии ууга, чэйгэ куттахха киһи доруобуйатыгар олус туһалаах утах буолан тахсар».

Оттон Павел Марков 6 кылаастан саҕалаан уулаах отонтон муорус оҥоруутунан дьарыгырар. Үөрэнээччи салайааччытын кытта уһун кэмнээх үлэлэрин сыанабыла дойду бастыҥ быыстапкатыгар кыһыл көмүс мэтээл буолла.

Павел Марков, Хатас орто оскуолатын 10 кылааһын үөрэнээччитэ: «2023 сыллаахха “Дни Дальнего Востока” диэн дьаарбаҥкаҕа тиийэн атыылаабыппыт. Куурбутун кэннэ 60% битэмиинэ барыта хаалар».

Ити курдук Хатас орто оскуолатыгар толкуйтан саҕалаан оҥорон таһаарыыга диэри ситимнээх үлэ барар. Оҕолор үөрэҕи таһынан дьарыктаах буолуу киини кытта дуогабарынан хамнас аахсаллар.

Николай Матвеев, Хатас орто оскуолатын дириэктэри саҥаны киллэриигэ уонна агро хайысхаҕа солбуйааччы: «Оҕолорго наһаа интириэһинэй, тоҕо диэтэргэ бырайыактара докумуоннарын барытын оҥороммут, ситиһии ылан кинилэргэ көҕүлүүр күүс буолар дии саныыбын».

Маны сэргэ агро хайысхалаах оскуола биир сүрүн сыала-соруга - ыччат тыа хаһаайыстыбатын салаатыгар сыстыыта. Быйылгы бүтэрээччилэртэн 11 оҕо бу хайысханы талбыт.