Устудьуоннар күнтэн сэрээттэнэр уоту биэрэр үрүсээги айдылар

Эдэр учуонайдар өссө биир ситиһиилэрэ. Уота-күөһэ суох сиргэ тиийдэххэ бу сүгэһэр суумка көмөтүнэн аныгы олохтон хаалсыбаккын.  Күн сырдыгынан иитиллэр ураты үрүсээк лаампалаах, розеткалаа уонна  телефону ханна баҕар сэрээттиир кыахтаах. Николайдаах Василий былырыын устудьуоннар стартаптарыгар ситиһилээхтик кыттан бу бырайыагы олоххо киллэрдилэр.

Николай Местников, М.К. Аммосов аатынан ХИФУ доцена, техническай билим кандидата: "Күн уотуттан сэрээттэнэр аккумулятордаах. Биир баттааһынынан холбонор. Хас да өҥүнэн тыгар лаампалаах".

Бу анал үрүсээк күн сырдыгыттан иитиллэн икки күҥҥэ тиийэ  сылдьар кыахтаах. Ыйааһына баара-суоҕа 5 киилэ. Дьон-сэргэ айылҕаҕа тахсарыгар, бултка-алтка, ыраах айаҥҥа олус туһалаах буолуо диэн эрэнэллэр.

Николай Местников, М.К. Аммосов аатынан ХИФУ доцена, техническай билим кандидата: "Үрүсээкпитигэр тимир күрүчүөк ииллибит сүгэ сылдьан ииттэрэр гына. Күн уотун тэйитэр панеллары көмөлөһүннэрдэххэ өссө түргэнник сэрээттэнэр".

Билигин бу үрүсээги боруобаҕа диэн киин куоракка атыыга таһааран эрэллэр. Онтон салгыы  патенҥа үлэлэһиэхтэрэ.  

Аспираннар научнай чинчийиилэри оҥороллорун таһынан, устудьуоннары үөрэх билиитигэр уһуйаллар. Күн бүгүн техническэй институкка 8 бөлөҕүнэн 100 тахса устудьуон үөрэнэр.

Нам улууһуттан төрүттээх устудьуон Альберт Соловьев 3-с кууруска үөрэнэр.

"Николайдаах Василий ыытар уруоктарын олус диэн күүтэбит, куруук интэриэһинэй холобурдары аҕалан көрдөрөллөр, оҥорботохпутун оҥорон, чинчийэн көрөбүт", - диэн Альберт Соловьев - М.К. Аммосов аатынан ХИФУ ФТИ 3-с кууруһун устудьуона кэпсиир.

Саҥа лаборатория өссө элбэх техническэй арыйыыны оҥоруо диэн үлэьиттэр да,  устудуьуоннар ди улахан эрэллээхтэр.

Василий Реев, М.К. Аммосов аатынан ХИФУ аспирана, лаборатория сэбиэдэссэйэ: "Түөрүйэ эрэ өттүнэн буолбакка ону таһынан илиинэн үлэлии үөрэниэхтээхтэр. Быраактыка чааһыгар билоиилэрэ эмиэ киэҥ буоларын ситиһэбит. Бу өттүгэр биһиги Николайдыын күүскэ үлэлэһэбит".

Бу  уоту биэрэр   үрүсээк Саха сирин ураты тыйыс усулуобуйатыгар олус наадалаах уонна туһалаах буолара саарбаҕа суох. Эдэр учуонайдар бу ситиһиинэн тохтоон хаалбакка өссө да былааннара киэҥ.