Михаил Щепкин аатынан тыйаатыр училищатын бүтэрбиттэр 50 сылларын бэлиэтииллэр

Үйэ аҥара өттүгэр Щепкин аатынан театральнай училищаны бүтэрэн артыыс идэтин ылбыт, тыйаатыр сүнньэ буолбут көлүөнэ - быйыл үбүлүөйдээх сыла. Онон көрөөччүлэргэ саҥа испиэктээкили бэлэмниир.

Саха Өрөспүүбүлүкэтин үтүөлээх артыыһа Зоя Попова сарсыардаттан кэлэн хоһугар саҥа испиктээкилгэ оруолугар киирээри бэлэмнэнэ олорор.

Зоя Гаврильевна бу сыллар устата элбэх оруолга оонньоотум, ордук сахалыы айымньыыларга оонньуурбун ордоробун диэн этэр. Артыыс ханнык баҕар оруолга бэлэм, барытын сатыыр, бэйэтин көрүнэр, холобур болуохтаах диэн этэр.

Зоя Попова, СӨ үтүөлээх артыыһа: «Үйэлээх сааһын тухары бэйэтин ханнык баҕар оруолга бэлэм сылдьыахтаах. Көрөөччүлэр эйиигин астына көрүөхтэрин баҕараллар. Мин оҕо сылдьан оннук этим. Артыыстар олох хартыына курдук дьоннор дии саныыр этим. Артыыс диэн киһи киһитэ, боростуой дьон дии саныыбын».

1974 сыллаахха - эдэр артыыстар, үөрэхтэрин бүтэрэн дойдуларыгар төҥнөн күн бүгүннээҕи диэри - тыйаатыр чаҕылхай артыыстара, Көмүс студия выпускниктара диэн ааты дьоһуннук илдьэ сылдьаллар. Билиҥҥи көлүөнэ артыыстарга холобур буолаллар. 

Дьулустаан Семёнов, СӨ үтүөлээх артыыһа: «Хаһан да өһүллүбэт, хаанынан да суураллыбат ытык иэстээх буолабын. Тоҕо диэтэргэ кинилэри кытта бииргэ үөрэммит Ольга Васильевна Григорьева баар этэ, хомойуох иһин билигин Орто Дойдуга суох. Кини миэхэ бу артыыс киэҥ аартыгын арыйан биэрбит, үөрэппит, такайбыт учууталым буолар. Онон мин кини бииргэ үөрэммит үөлээннээхтэрин кытта биир тэрилтэҕэ үлэлиирбиттэн киэн туттабын».

Саха Өрөспүүбүлүкэтин үтүөлээх артыыһа Домна Уйгурова сөбүлүүр идэҕинэн үлэлиир дьол диэн этэр. Билиҥҥээҥҥи диэри сыанаҕа оонньуурум дьол, тыйаатыр олоҕо бэйэтэ туспа эйгэлээх, оттон артыыс диэн талаан эрэ буолбакка, бэйэҕэр куруук улэлэһиэхтээххин диэн этэр.

Домна Уйгурова, СӨ үтүөлээх артыыһа: «Син биир режиссер тугу этэрин толороҕун уонна бэйэҥ төбөлөөх, дууһалаах киһи быһыытынан бэйэн эмиэ толкуйдаргын киллэрэр буоллаҕын. Син биир бэйэн айылҕан, быһыыҥ-майгын оруолга көстөр».

Быйылгы тыйаатыралынай сезон көмүс үһүс устуудьуйатын 50 сыллаах үбүлүөйдээх сылыгар Арассыыйа уонна өрөспүүблүкэ таһымнаах кэккэ тэрээһиннэр былааннаналлар.