Хоту уонна Арктическай улуустарга уунан таһаҕаһы тиэйии түмүктэннэ

Өрөспүүбүлүкэ суудунаны ыытааччыларыгар биир саамай эппиэтинэстээх уонна долгутуулаах үлэлэрэ түмүктэннэ. Хотугу өрүстэринэн таһаҕаһы миэститигэр тиэрдиигэ, быйыл Яна өрүс уутун таһыма намыһаҕынан үгүс күчүмэҕэйдэр үөскээтилэр.

Никита Павлов, СӨ гражданскай оборона уонна нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы: «Дьааҥы өрүһүгэр сылтан сыл аайы элбии турар. Быйыл уубут аҕыйах буолан хараабыллар айаннаабакка мээнэ турдулар. Ону сөптөөх үлэни ыытаммыт күннээҕи хонтуруолга ыламмыт таһаҕастарбытын сөпкө үллэрэн тэрилтэлэри үлэлэттибит. Оннук гынан сорудахпытын толордубут».

Ол курдук, быйыл Хотугу уонна Арктика өрүстэринэн нэһилиэнньэ олоҕор наадалаах таһаҕас уопсайа 666263 туонна ол эбэтэр былаан 100% туолла. Хаһаайыстыбалаах эбийиэктэргэ уматык, чох уопсайа 515 тыһынча туонна 838 туонна, ол эбэтэр былаан 88% тиийдэ. Бу барыта сакаастааччыллар, таһаҕаһы тириэрдээччилэр биир сомоҕо буолан үлэлээбит түмүктэрэ буолар.

Туйаара Мордосова, Саха Өрөспүүбүлүкэтин гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыы министиэристибэ пресс-сэкиритээрэ: «Хоту улуустарга уунан таһаҕаһы тиэйии бириэмэтигэр оперативнай бөлөх тэриллэр, нэдиэлэ аайы мунньахтар ыытыллаллар. Бырабыытылыстыба маҥнай солбуйааччыта Дмитрий Садовников уонна биһи миниистирбит Дмитрий Лепчиков салайыытынан сөптөөх миэрэлэр, күүстээх үлэ ыытыллан бүгүҥҥү күҥҥэ арктическай навигация түмүктэннэ».

Уунан таһаҕаһы тиэйии түмүктэнээтин кытары, аны кыһыҥҥы муус суолунан тиэйиигэ бэлэмнэнии саҕаланыа. Билигин күн-дьыл быыһык кэмигэр таһаҕаһы көтөр аалларынан тиэйэллэр. Үлэ номнуо саҕаланна.

Анна Григорьева, «Арктикатааҕы атыы-логистика хампаанньата» тэрилтэ атыыга-эргиэҥҥэ генеральнай дириэктэрин солбуйааччы: «Бу нэдиэлэттэн стыковочнай рейстэр диэн оҥоһулла тураллар. Абый ТЛЦ-тан ыраах сытар нэһилиэктэригэр уонна Чокурдаах нэһилиэгэр бүгүн көттө. Уус Куйга ТЛЦ-тан нэһилиэктэргэ көтүөхтээх»

Уунан уматык, чох тиэйиитин былаана 350,6 тыһ. туонна тириэрдиллибит эбит буоллаҕына, уунан аһы-үөлү 2 тыһ. 749 туоннаны тириэртилэр.