Дмитрий Коркин турнирыгар кыттар хамаандалар бүтэһиктээх дьарыктарын ааһаллар

Бүтэһик икки күнү баттаһа спортсменнар дьарыктара сытыырхайар. Өрөгөй спорт комплексын тустуу саалатыгар билигин араас дойду бөҕөһө эрчиллии быһыытынан илин-кэлин түсүһэр, онтон икки күнүнэн мэтээл иһин киирсиэхтэрэ. Чурапчыттан сылдьар Олег Фомин быйыл Коркин турнирыгар иккиһин холонуоҕа. Былырыын-быйыл күүстээх дьарыгын түмүгүн көбүөргэ көрдөрүөҕэ.

Олег Фомин, Д.П. Коркин кэриэһигэр норуоттар икки ардыларынааҕы турнир кыттыылааҕа: «Бэйэбиттэн үрдүк көрдөрүүнү көрдүүбүн. Икки сыл иһигэр элбэҕи эптим, элбэх күрэхтэһии кыайдым. Биһи ыйааһыммыт Саха сиригэр күүһүрдэ, 4-5 тэҥ уолаттар бааллар, аҥардас Өрөспүүбүлүкэ иһигэр күрэс күүстээх».

Буоларын курдук турнирга ааттаах-суоллаах итиэннэ саҥа тахсан эрэр бөҕөстөр кыттыахтара. Саха сирин сүүмэрдэммит хамаандатыгар Арассыыйа үрүҥ көмүс призера, юниордарга Европа чемпиона Лев Павлов, итиэннэ былырыыҥҥы Коркин турнирын финалистара Константин Капрынов, Роман Николаев уонна Ньургун Сергин бааллар.

Вадим Семёнов, Саха сирин сүүмэрдэммит хамаандатын сүрүн тренерэ: «Ол ыйааһыҥҥа бүгүҥҥү турукка сайаапкабытыгар 91 спортсмен. Сайын лааҕырга, Арассыыйа сборнайыгар сылдьыбыттара уонна бу күһүҥҥэттэн бэйэбит дьиэбитигэр бэлэмнэнэ сылдьабыт».

Үбүлүөйдээх 15-с турнирга 12 тас дойдуттан спортсменнар кэллилэр. Кинилэр истэригэр Беларусь, Казахстан, Кыргызстан, Монголия, Иран, Индия хамаандалара. Монголия сүүмэрдэммит хамаандата күүстээх эдэр бөҕөстөрүн аҕалбыттар. Истиэп дойдутун спортсменнара көбүөргэ   аатырбыт тренер Коркин албастарын туһаналлар, кинилэр тренердара Чурапчы тустуутун оскуолатыгар хатарыллыбыт.

Бат-Улзий Баттогтох, Монголия сүүмэрдэммит хамаандатын тренерэ: «Командаҕа 8 спортсмен. Аан дойду күрэхтэһии призера уонна Монголия уонна Азия чемпионнара бааллар».

Улуу тренер Дмитрий Петрович Коркин кэриэһигэр норуоттар икки ардыларынааҕы турнир Өрөгөй спорт киинигэр алтынньы 19-20 күннэригэр ыытыллыаҕа. Билигин манна түүннэри-күнүстэри бэлэмнэнии үлэлэрэ бараллар.