Бэс Күөлгэ таас эбийиэктэр дьэндэйэллэр

Бэс Күөл олохтооҕо устудьуон Эрхаан Федоров өрөбүлүн кэмигэр дьонноругар кыстыкка киирэллэригэр көмөлөһө кэлбит. Аҕыйах сыл иһигэр дойдутугар саҥа таас эбийиэктэр тутуллан киирэн эрэллэрин көрөн үөрэр.

Эрхаан Фёдоров, Бэс Күөл нэһилиэгин олохтооҕо: "Саҥа оскуола тутулунна, аны элбэх хайысхалаан киин тутулла турар. Олохтоохтор үөрэбит эрэ сайдыы барарыттан".

Бэс Күөл нэһилиэгэ билигин биллэрдик тупсан, уларыйан турар. Өрөспүүбүлүкэ салалтата бары ыытыллар үлэни болҕомто киинигэр тутар.

2021 сыллаахха Бэс Күөл нэһилиэгэ ойуур баһаарыттан эмсэҕэлээбитэ. Кылгас кэм иһигэр 34 олорор дьиэни туппуттара. Ол сыл Ил Дархан Айсен Николаев Дойду президенигэр Владимир Путиҥҥа бу нээһилиэккэ социальнай эбийиэктэри олоххо киллэрэргэ этии киллэрбитэ. Өйөбүл ылан, анал федеральнай субсидия керүллэн 2022 сыллаахха тутуу саҕаламмыта.

Айсен Николаев, СӨ Ил Дархана: "Дойду президенэ биэрбит сорудаҕынан култуура уонна спорт эбийиэгэ тутуллан бүтэн эрэр. Былаан быһыытынан бу сыл бүтүөр диэри үлэҕэ киириэхтээх. Билигин үлэ тигинэччи бара турар. Тутуу матырыйаала бүтүннүү кэлэн, тутааччылар тэтимнээхтик үлэлииллэр".

Күн бүгүн эбийиэккэ 20-тэн тахса киһи үлэлиир, тутуу 69 быраһыана бэлэм. Алтынньы ортотугар итии ситимин киллэрэн, ис бараанын саҕалыахтара. Элбэх хайысхалаах киин бу сыл бүтүүтэ киирэригэр Ил Дархан Айсен Николаев сорудахтаата.

Саҥа эбийиэккэ 250 миэстэлээх саала, 50 миэстэлээх трибуналаах спорт саалата, дьарыктанар саала, библиотека, быыстапкалыыр уонна мунньах ыытар, дьоҕус урбааны сайыннарар аналлаах хостор баар буолуохтара, маны таһынан бу эбийиэккэ хас да тэрилтэ киирэрэ былааннанар. Маны таһынан киин тиэргэнигэр сынньанар былаһаакка тэриллиэҕэ.

Андрей Асекритов, "Служба государственного заказчика РС(Я)" тэрилтэ генеральнай дириэктэрин солбуйааччытын эбээһинэһин толорооччу: " Тутуу хаамыытын хонтуруоллуу нэдиэлэ аайы кэлэбит. Олохтоохтор кэллэхпит аайы туох үлэ барарын, хаһан киирэрин ыйыталлар. Тас бараанын оҥорууга сылдьабыт, ититии систиэмэтэ оҥоһуллубута. Тас өттүн тупсарыы, ол иһигэр бетон үлэтэ бу күннэргэ бүтүөхтээх".

Атамай нэһилиэгэр 600 тахса киһи олорор. Быйылгы үөрэх дьылыгар олохтоохтор саҥа 150 миэстэлээх таас оскуоланнылар, оттон сыл бүтүүтэ элбэх хайысхалаах саҥа кииннэнниэхпит диэн үөрэ кэпсииллэр.

Людмила Варламова, Бэс Күөл нэһилиэгин олохтооҕо: "Хаһан бүтэрин эрэ күүтэбит. Үөрүүбүт муҥура суох".

Култуура өттүнэн өссө сайдарга, спордунан дьарыктанарга бары усулуобуйа тэриллэн эрэриттэн олохтоохтор үөрэллэр. Оттон тыа сиригэр маннык улахан, суолталаах тутуулар киирэллэрэ нэһилиэнньэ, эдэр дьон тыа сиригэр олохсуйарыгар, олох- дьаһах хаачыстыбатын үрдэтиигэ төһүү күүс буолар.