Алтынньыга киирэр уларыйыылар

Бюджет үлэһиттэрин хамнаһа үрдээтэ. Манна федеральнай үптэн төлөнөр тэрилтэ үлэһиттэрэ хапсыахтара. Ол курдук Ис дьыала министиэристибэтэ, оскуола уонна уһуйаан үлэһиттэрэ, медицинэ уонна социальнай эйгэ исписэлиистэрэ, байыаннай сулууспалаахтар, култуура үлэһиттэрэ, билим уонна үөрэхтээһин эйгэтэ. Бу үрдээһиҥҥэ регион уонна муниципальнай тэриллии бюджетыттан хамнастаанааччылар хапсыбаттар.

Алтынньы 1 күнүттэн байыаннай пенсия 5,1 % үрдүүр. Ол кэннэ орто кээмэй 41600 солкуобай буолуо. Төлөбүр кээмэйигэр сулууспа сыла уонна сыбаанньа бычаччы оруоллаах. 

Бу ыйтан тулаайах эбэтэр төрөппүт көрүүтэ-истиитэ суох хаалбыт оҕолор дьиэ уочаратыгар сайабылыанньаны "Госуслуги" портал нөҥүө биэрэр кыахтаннылар. Бу олорор дьиэни атыылаһыыга көрүллэр төлөбүр уонна ипотеканы толору сабыы туһунан этиллэр.

Тас дойдуттан массыынаны киллэрии төлөбүрэ улаатта. Ол аата юридическэй сирэйдэр РФ тимир көлөнү аҕалыылара ыараата. Бу уларыйыы Россия оҥоһуллар тиэхиньикэҕэ эмиэ тарҕанар. Дойду бырабыыталыстыбатын балаҕан ыйынааҕы дьаһалынан массыынаҕа уонна бырысыапка утильсбор 70-85%  үрдүөҕэ. Экспертэр сылыктыылларынан бу үрдээһин массыына сыанатыгар биллэ дьайыа. Оттон бу уларыйыы 3 лиитэрэҕэ диэри мотуордаах массыынаны ылар түгэннэригэр биирдиилээн дьоҥҥо тарҕаммат.

Утильсбор диэн көлөнү оҥорооччулар эбэтэр тас дойдуттан киллэрээччилэр судаарыстыьбаҕа биир кэмнээх төлөбүрдэрэ. 

Элбэх оҕолоох дьиэ кэргэттэр чэпчэтиини онлайн ылар кыахтаннылар. Бу ыйтан элбэх оҕолоох дьиэ кэргэттэр чилиэннэрэ электроннай удастабырыанньа QR-кодунан туһаныахатара. Саҥа көрүҥ удастабырыанньаны биэрии дойду үрдүнэн ыытылла турар. Биир кэлим элбэх оҕолоохтор реестрдарыгар киирбиттэр тута ылыахтара. Билигин бу испииһэккэ 1.4 мөл. ыал баар.

Суол саахалын былааҥката уларыйда.

ОСАГО страховкатын кытта бииргэ бэриллэр саахал туһунан блаҥкаҕа QR-код баар буолла. Бу код "ГосуслугиАвто" порталга быһа киллэриэ. Манна суол иниспиэктэрдэрин кыттыгаһа суох быһылааны хайдах сөпкө толоруу ыйыллыа.

Армияҕа күһүҥҥү хомуур саҕаланыа. Быйылгы хомуур алтынньы маҥнайгы күнүттэн сыл бүтэһик күнүгэр диэри салҕаныа. Сокуон быһыытынан бэбиэскэни 18-30 саастарыгар диэри эр дьон тутуохтара. Ол аата 1994 сылтан 2006 сылга диэри төрүөхтэр. Хомуурга бу сылга 27 саастарын туолбут байыаннай билиэтэ суохтар эмиэ хапсаллар. Сулууспаҕа доруобуйаларын туругунан, эбэтэр акредитацияны ааспыт Айти хампаанньа үлэһиттэрэ, устудьуоннара барбаттар.

Бу сылтан электроннай бэбиэскэни ыытан боруобалаан көрүөхтэрэ. Куйаар ситиминэн Марий Эл өрөспүүбүлүкэтин, Сахалин уонна Рязань уобалаһын эр дьоно тутуохтара.