Ат сүүрдүүтэ

Ат сүүрүүтүн сэҥээрээччилэрэ, ааттаах-суоллаах сүүрүктэрэ эмиэ бары биир түһүлгэҕэ түмүстүлэр. Өрөспүүбүлүкэтээҕи ат сүүрдүүтэ судаарыстыннай политическэй деятель Ыстапаан Аржаков төрөөбүтэ 125 сылыгар ананна. Уопсайа түөрт дистанцияҕа 30-тан тасха сүүрүүк ат илин-кэлин түһүстүлэр.

Александр Капитонов, кылаабынай судьуйа: "Уопсайа түөрт сүүрүү буолуоҕа. Бастакынан 2 саастаах тыйдар барыахтара. Бырабыыталыстыба бэрэссэдээтэлин бирииһигэр саха боруодалара сүүрүөхтэрэ. Үһүскэ ыраас хааннаах сылгылар. Онтон төрдүс сүүрүүгэ 2400м. Соҕурууттан кэлбиттэр күрэхтэһиэхтэрэ".

Күрэхтэһии эстафета быһыытынан барда, кыайыылааҕы ким төһө түргэнник кэлбитинэн быһаараллар.

Саҥа саҕалааччы сүүрүүктэри кытары уопуттаах, Саха сирин бары кэриэтэ сүүрүүлэригэр кыттыбыт ааттаах-суоллаах аттар күрэхтэстилэр. Көрөөччүлэр күрэхтэһиини төһө да тымныытын, тыаллааҕын аахсыбакка сэҥээрэ, тиһэҕэр диэри көрөн дуоһуйдулар.

Өр буолбакка, бастакы кыайыылаах аата ааттанна. 1600 миэтэрэҕэ Чурапчы быһый ата, уопуттаах сүүрүүк Арчылаан эрэллээхтик кыайан көрөөччүлэри үөртэ.

Юрий Посельский, Чурапчы улууһун ат сүүрдүүтүн спордун Федерациятын президенэ: "Сүрдээҕин үөрдүбүт. Биһиги Арчылааҥҥа эрэнэр этибит. Быйыл олус үчүгэйдик сүүрдэ. Онон эрэл баар этэ. Бэйэм дьоммун, бары ыалдьыбыт дьону кыайыынан эҕэрдэлиибин".

Ат сүүрдүүтүн быйылгы сезона бэрт сэргэхтик түмүктэннэ. Кыайыы өрөгөйө, хотторуу хомолтото хас саҥа старт бэриллиннэҕин аайы көрөөччү оргуйан олордо. Ат сүүрдүүтүнэн дьарыгырар, күрэхтэһээччилэр аны эһиил буолаары турар сүүрүүлэргэ бэлэмнэрин иһитиннэрдилэр.