Саха сиригэр РФ оҕо быраабыгар боломуочуйалаах Мария Львова-Белова үлэлээтэ

Оҕо омбудсмена Мария Львова-Белова Дьокуускай куоракка биир күн үлэлээтэ. Бастаан Дьиэ кэргэҥҥэ элбэх өҥөнү оҥорор киин үлэтин кытта билистэ. Бу киин быйыл ыам ыйыгар арыллыбыта. Кииҥҥэ дьиэ кэргэттэргэ, ол иһигэр ыарахан олохтоох эдэр ыалга, ону тэҥэ анал байыаннай дьайыы кыттыылаахтарын дьиэ кэргэттэригэр, биир кэлим социальнай көмө оҥоһуллар.

Кииҥҥэ оҕону дьарыктыыр, сайыннарар хостор, ону тэҥэ эдэр дьиэ кэргэҥҥэ сүбэ-ама биэрэр хас да исписэлиис үлэлиир. Бу киин дьиэ кэргэҥҥэ бары өттүнэн табыгастаах, элбэх туһаны, көмөнү оҥорор.

Анастасия Дьяконова, Дьиэ кэргэҥҥэ элбэх өҥөнү оҥорор киин дириэктэрэ: "Биһиги кииммитигэр номнуо 300 тахса көмө оҥоһулунна.Ол курдук оҥоһуллар өҥө араас хайысханан ыытыллар. Психологтар, социальнай педагогтар, юристар нэһилиэнньэҕэ анаан үлэлииллэр. Социальнай хантараак ылааччылар биһиэхэ кэлэн үөрэнэллэр. Ону сэргэ үбү-харчыны сөпкө туһаныыга уһуйабыт. Оҕону иитэ ылар дьиэ кэргэттэри үөрэтиибит тиһигин быспат".

Оҕо быраабыгар боломуочуйалаах Мария Львова-Белова үлэтин хаамыытынан уустук балаһыанньаҕа түбэспит дьахталлары быстах кэмҥэ тутар кииннэ сырытта. Бу киин 2020 сыллаахтан үлэлиир, өрөспүүбүлүкэ үрдүнэн соҕотох тэрилтэ. Манна ыарахан балаһыанньаҕа түбэспит ийэлэргэ бары өттүнэн көмө оҥоһуллар.

Мария Чемпина, уустук балаһыанньаҕа түбэспит дьахталлары быстах кэмҥэ тутар киин куратора: "Бигиһи тэрилтэбитигэр үс хос баар, ону таһынан биир уопсай хос. Манна астарын бэйэлэрэ буһарыналлар. Амарах санаалаах дьон бэрсибит бордуукталарын биһиэхэ олорор дьахталларга биэрэбит. Сорхтор олох харчыта суох буолаллар. Үлэ булалларыгар көмөлөһөбүт, доруобуйаларын көрлдөрүнэллэригэр көмөлөһөбүт. Оҕо харчытын оҥотороллоругар эмиэ. Бастаан биир ыйга дуогабар баттаһабыт, онтон хайдах турукка сылдьарын көрөнуһатыахпытын сөп".

Салгыы үлэлиир бөлөх Өрөспүүбүлүкэтээҕи харах балыыһатыгар уонна национальный медицинэ киинигэр сылдьан олохтоохтору кытта көрсөн санааларын иһиттэ. Оҕо омбудсмена өрөспүүбүлүкэҕэ дьиэ кэргэни уонна оҕону өйүүр дьаһаллар элбээн уонна кэҥээн иһэллэрин көрөн, санаатын үллэстэр.

Мария Львова-Белова, РФ оҕо быраабыгар боломуочуйалаах: "Ил Дархан Айсен Николаев 2028 сылга диэри оҕо дьиэтигэр иитиллэр оҕо ахсаанын 50% аччатыы туһунан уурааҕа олус хайҕаллаах дьаһал. Тут бу эйгэҕэ үлэлиир дьону көҕүлүүр. Эригийиэн бу сорудаҕы ситиһиэ диэн эрэнэбин. Оччоҕо инникитин үтүө холобур оҥоруохпут".

Оҕо быраабыгар боломуочуйалаах Мария Львова-Белова Саха сиригэр дьиэ кэргэҥҥэ уонна оҕоҕо бары өттүнэн улахан өйөбүл баарын бэлиэтээтэ итиэннэ дьиэ кэргэн сыаннастарын бэлиитикэтэ күүстээҕин ыйда.