Саха сирин бөдөҥ балыыһатыгар өрөмүөн

Инниктин бу хоско КТ, МРТ, рентгент курдук ыарыһаҕы чинчийиигэ тутаах аппарааты үлэлэтэр быраастар манна кииннэнэн үлэлиир буолуохтара. Маныаха анаан улахан өрөмүөн үлэтэ ыытылынна. Онон балыыһаҕа киирбит ыарыһаҕы да, телемедицинэ көмөтүнэн улуустан да дьону чинчийии тэтимириэҕэ. 

Дыгын Попов, Өрөспүүбүлүкэтээҕи 2№-дээх балыыһа лучевой диагностика салаатын салайааччы: “Манна 12 үлэ миэстэтэ баар буолар. Биһиги балыыһабыт элбэх хайысхалаах. Өрөспүүбүлүкэттэн ыарахан ыарыһахтар бары манна кэлэллэр. Быраастар биир сиргэ олорон үлэлииллэрэ лучевой диагностика таһаарыылаах үлэтин көҕүлүөҕэ”.

Суһал эпэрээссийэни оҥорор саалаҕа истиэнэни эрэ буолбакка, төрдүттэн өрөмүөн барар. Ол курдук түннүк, муоста бүтүннүү уларыйар. Өрөмүөннэммит саала үрдүкү технологиялаах оборуудабанньаны туһаныыга сөп түбэһэр буолуоҕа. Бу, биллэн турар, хаачыстыбалаах эмтээһиҥҥэ, тэтимнээх үлэҕэ кыах биэрэр. Улахан үлэ билигин бастакы этээс көрүдүөрүн саҥардыыга барар.

Леонид Слепцов, Өрөспүүбүлүкэтээҕи 2№-дээх балыыһа кылаабынай бырааһы солбуйааччы: “Быйыл биһиги балыыһабытыгар уопсайа 20 тахса мөлүөйүөннээх өрөмүөнү ыыта сылдьабыт. Холобур, бастакы этээс көрүдүөрүн истиэнэтин саҥаттан оҥорон эрэбит. Ону таһынан муостатын уонна үрдүн оҥоруохпут. Маны сэргэ атын салааларга эмиэ өрөмүөн үлэтэ барда. Тоҕо диэтэр саҥа оборуудабанньаны быйыл ааспыт сыллартан элбэҕи ыллыбыт. Онно анаан өрөмүөн ыытабыт”.

Өрөспүүбүлүкэтээҕи 2 нүөмэрдээх балыыһаҕа күн бүгүн 470 тахса ыарыһах сытан эрэ эмтэнэр. Суһал ыарыһахтар Саха сирин бары улуустарыттан кэлэллэр. Онон манна үлэ түүн да күнүс да тохтообот. Маныаха өрөмүөн  балыыһа үлэтигэр  туох да харгыһы оҥорбот гына барыахтаах. 80-с  сыллардааҕы тутууга быйыл хайа да сыллаҕар улахан кээмэйдээх өрөмүөн барда. Суолталаах үлэ эстакаданы хапытаалынай саҥардыыга ыытылынна.   

Маны сэргэ Үлүйүүнү уонна иһэлийиини эмтиир кииҥҥэ өрөмүөн үлэтэ барар. Манна улахан дьон салаатыгар палааталары тупсарбыттар, түннүктэри уларыппыттар, ирдэбилгэ эппиэттиир ааннары туруораллар. Уһук Илиҥҥэ саамай улахан уонна иһэлийиигэ, үлүйүүгэ улахан ситиһиилэрдээх киин  уруккута байыаннай госпиталь дьиэтигэр үлэлиир.

Евгений Петров, Үлүйүүнү уонна иһэлийиини эмтиир киин салайааччытын эбээһинэһин толорооччу: “Байыаннай дьиэ балыыһа ирдэбилигэр сөп түбэспэт. Администрация көмөтүнэн сыллата өрөмүөн ыытыллар, үлэ барар”. 

Өрөспүүбүлүкэтээҕи 2№-дээх балыыһаҕа өрөмүөн үлэтэ алтынньы бүтүүтэ түмүктэниэҕэ. Саҥалыы эпэрээссийэлиир саалаларга турбут оборуудабанньаларга ыытыллар үлэ кэҥиэҕэ. Холобур, эндопротезированиеҕа сылга 800 эпэрээссийэни былаанныыллар.