Киэҥ нэлэмэн дойдубут араас омуктара биир сиргэ түмүстүлэр

Өрөбүл күн чуҥкуйан турбут тыйаатырга ырыа-тойук, үҥкүү-битии ньиргийэ түстэ. Дойдубут бастыҥ айар кэллэктииптэрэ бэстибээли түмүктүүр гала-кэнсиэр сыанатыгар тахсарга бэлэмнэнэллэр. Саала уҥа өттүгэр Забайкальскай кыраай норуодунай фольклорнай кэллэктиибэ ыллыыр-туойар,оттон хаҥас өттүгэр Тыва фольклорнай ансаамбыла музыкальнай инструменнарга оонньуур.

Бэстибээлгэ Красноярскай кыраайтан үгүс артыыстаах ансаамбыл кэлбит эбит буоллаҕына, Хакасия өрөспүүбүлүкэтин култууратын суос-соҕотох Аржан Тодош билиһиннэрэр. Кини түүр омуктар биир ураты искусстволарын хабарҕа ырыатын толорор. Сыанаҕа тахсыан иннинэ биһиги устар бөлөххө иһитиннэрдэ.

Аржан Тодош оҕо эрдэхтэн искусство кэрэ эйгэтигэр сыстыбыт. "Билигин бу хабарҕа ырыатын оҕолорго үөрэтэбин, итиэннэ араас музыкальнай инструменнарга оонньуубун. Маны сэргэ филармонияҥа солистыыбын, бэйэм салайар бырайыактардаахпын, этно-рок бөлөхтөөхпүн. Кэнники уон сылга фольклорнай ансаамбыллар олус тэнийдилэр", - диэн бэстибээл кыттыылааҕа Аржан Тодош кэпсиир.

Тэрээһиҥҥэ дойдубут 12 регионуттан араас айар кэллэктииптэр кэллилэр. Ырыаны-үҥкүүнү оройуттан туппут дьон бэйэ олорор сирдэрин, култуураларын, үгэстэрин искусство нөҥүө көрдөрөллөр. Маныаха бэстибээл сүрүн сыалынан биир дойдуга олорор араас норуоттар бары түмсүүлээх, доҕордуу буолалларын бэлиэтиир. Номнуо үһүс сылын ыытыллар.

Сергей Семёнов, СӨ норуот айымньытын дьиэтин дириэктэрэ: "Быйыл үһүс төгүлүн маннык хабааннаах ыытыллар. Бу күн Саха сиригэр уонна Луганскай норуодунай өрөспүүбүлүкэҕэ бэстибээл ыытылла турар. Регион бастыҥтан бастыҥ кэллэктииптэрэ кэлэн кытталлар. Эрдэ Москва куоракка сүүмэрдээһин ыытыллар".

Бу күн Саха сирин олохтоохторо уопсайа 10 араас кэллэктиип толоруутун көрдүлэр. Доҕордоһуу болуоссатыгар үгүс көрөөччү тоҕуоруһа мустан, сэргэхсийэн бардылар. Оттон бэстибээл араас норуоттар төгүрүччү үҥкүүлэринэн үөрүүлээх быһыыга-майгыга түмүктэннэ.