Баһаарынайдар оһохтоох ыаллары бэрэбиэркэлииллэр

Оһох оттон сылааһы киллэрии мас дьиэлээх дьоҥҥо "тыын" кыһалҕа. Вячеслав Буяков кэргэнин кытта Пристанская уулуссаҕа олорбута 20-тэн тахса сыл буолла. Кинилэр сыл ахсын оттукка кириэх иннинэ оһох туругар улахан болҕомто уураллар.

Вячеслав Буяков, Дьокуускай олохтооҕо: «Оһоҕум туругн наар көрө-истэ сылдьабын. Кыс ортото алдьанар түгэнигэр, ким да итиччэ тымныыларга хасыһарын сөбүлээбэтэ биллэр. Онон сайын оттук сезонугар бэлэмниибин. Быйыл онон-манан кирпииччэлэрин, билииккэтин уларыттым».

Элбэх оҕолоох Буяковтар дьиэ кэргэн оһохторун оттон, номнуо маҥнайгы астарын буһара сылдьаллар. Онон тымныылар түспүттэрэ кинилэргэ икки бүк үөрүүлээх.

Татьяна Буякова, Дьокуускай олохтооҕо: «Оһохпутун улахан тымныыларга оттобут. Аспытын барытын астатабыт. Шашлыгы кытта буһарааччыбыт. Ордук минньигэс буолар».

Оһохтоох дьоҥҥо тымныылар түстүлэр да икки төгүл эппиэтинэс санныларыгар сүктэриллэр. Дьиэ тоҥмотун гына уоту-күөһү куруук көрө-истэ сылдьыахха наада. Маны таһынан уокка сэрэхтээх буолуу ирдэбиллэрин тутуһар ирдэнэр. Статистика көрдөрөрүнэн сыл саҥатыттан киин куоракка 1395 баһаар тахсыбыта бэлиэтэннэ. 31 киһи араас эчэйии ылла, 41 киһи, хомойуох иһин, суорума суолланна.

Ыксаллаах быһыы-майгы министиэристибэтин үлэһиттэрэ сыл ахсын тымныылар түһэллэрин саҕана чааһынай дьиэлэрдээх уулуссалары кэрийэллэр. Дьон-сэргэ оттуллар оһохтору таһынан уотунан барар дьоҕус оһохтору эмиэ тутталлар. Онон уот күөдьүйэн тахсар куттала хас да бүк сытыырхайар диэн иниспиэктэрдэр бэлиэтииллэр.

Станислав Перевалов, Дьокуускайдааҕы баһаары утары сулууспа дьуһуурунай караулун салайааччыта: «Уот ситимиттэн, сыбаарка уотуттан, ититэр тэриллэртэн уонна арыгы содулуттан үксүн чааһынай дьиэлэргэ баһаар тахсар».

Быйылгы баһаар ахсаана былырыыҥҥы сылы кытта тэҥнээн көрдөххө 5%-нан үрдүк. 1395 баһаартан 647-тэ олорор сиэктэрдэргэ таҕыста.

Станислав Перевалов, Дьокуускайдааҕы баһаары утары сулууспа дьуһуурунай караулун салайааччыта: «Баһаар буолар түгэнигэр дьиэтээҕи төлөпүөнтэн 01 нүөмэргэ эрийэҕит, оттон суотабай төлөпүөнтэн 101 суһал нүөмэргэ эрийэн биллэрэҕит».

Маннык сэрэтэр, өйдөтөр сыаллаах үлэлэри Ыксаллаах быһыы-майгы министиэристибэтин иниспиэктэрдэрэ салгыы даҕаны тиһиктэрин быспакка ыытыахтара.