Дьокуускай куорат тупсаҕай көстүүтэ болҕомто киинигэр

Бырабыытылыстыба бэрэссэдээтэлэ Кирилл Бычков үлэ сырыытын Сайсары күөлтэн саҕалаата. Манна күргүөмнээх үлэ тиһигин быспат. Тутуу үлэтэ бүгүҥҥү күннэ 72% туолбут.  Үлэһиттэр Дьокуускай куорат күнүн баттаһа тутуу үлэтин түмүктүүр былааннаахтар. Мантан күһүн уоттаах-күөстээх, күөлү эргиччи бэлисипиэдинэн хатааһылыыр, хаамар сирдээх куорат биир бастын эбийиэгэ буолуохтаах.

Иван Гуляев, Дьокуускай куорат салалтатын градостроительнай уонна транспортнай инфраструктура салаатын салайаааччыта: «Паспорынан көрдөххө 5 учаастак баар. Былырыын бастакы учаастакка үлэ оҥоһуллубута. Сүрүн учаастага – Ийэ искибиэрэ. Сатыы хаамар улахан иэннээх болуоссат оҥоһуллуохтаах».

2-с эбийиэк Роман Дмитриев аатынан набережнай тутуута. Сынньалаҥҥа табыгастаах, көстүүтүнэн да хаалсыбат биэрэк таһынааҕы биир кэрэ сир үлэтин ыбылаана эмиэ болдьохтон хаалбат. Бүгүҥҥү күҥҥэ 85% бэлэм. Үлэ барыта балаҕан ыйын бүтэһигэр диэри бүтүөхтээх.

Афанасий Александров. "Главстрой" тэрилтэ салайааччытын солбуйааччы: «Роман Дмитриев аатынан кытылга тротуар уура сылдьабыт. Бу өрөбүллэргэ аспаал сүрүн үлэтэ бүттэ. Уопсай тутуу бэлэмэ билиҥҥи күҥҥэ 85%. Балаҕан ыйын бүтэһигэр бүтэриэхтээхпит».

Дьэ, уонна күүтүүлээх-кэтэһиилээх тутуу - Ленин болуоссата. Дьокуускай куорат ыалдьыттара, олохтоохторо күн-түүн эбиллэр уларыйыылары кэрэхсии көрөллөр. Үлэһиттэр эмиэ үлэлэрин өрө күүрүүлээхтик кэпсииллэр. Бастатан туран улахан болҕомто сэргэлэргэ.

Анатолий Алексеев, тутар хампаанньа дириэктэрэ: «Чорооннорун туруордубут. Барыта дьэҥкир уонна киэһээтин уоттаах буолар».

Бу эбийиэккэ 50-тан тахса киһи уонна 10-ча тиэхиньикэ үлэлиир. Сэргэлэр турдулар, фонтан монтаһа бүттэ.  Тымныылары баттаһа үлэ бүтүннүү түмүктэниэхтээх.

Анатолий Алексеев, тутар хампаанньа дириэктэрэ: «Тас көрүҥүн балаҕан ыйын ортотугар дылы бүтэриэхтээхпит. Фонтан туруоруута бүттэ».

Былааннтан хаалыы суох. Дьокуускай куораппыт тупсарын туһугар үлэһиттэр болдьоҕу баттаһардыы хамсаналлар. Бэрт сотору кэминэн хастыы эмэ сылы быһа күүппүт саҥа тутууларбыт дьон-сэргэ сылдьарыгар арыллан тупсаҕай усулуобуйаны үөскэтиэхтэрэр.