Балаҕан ыйын 1 күнүттэн элбэх оҕолоохторго саҥа өйөбүл көрүҥнэрэ күүтүллэр
Балаҕан ыйын маҥнайгы күнүттэн элбэх оҕолоох дьиэ кэргэн устудьуоннара орто анал үөрэхтэрин төлүүргэ 50 тыһ. солкуобай өйөбүл көрүллүөҕэ. Дьиэ кэргэн дохуотун таһыммыттан тутулуга суох үөрэх дьылыгар биир кэмнээх төлөбүрү 23-гэр диэри саастаах устудьуоннар ылар кыахтаныахтара. Тустаах докумуоннары устудьуон 18 сааһын туолбут буоллаҕына бэйэтэ туттарыан сөп, оттон сокуоннай сааһын туола илик буоллаҕына төрөппүттэрэ туттараллар.
Сардана Самсонова, СӨ Үлэ уонна социальнай сайдыы министиэристибэтин демография уонна дьиэ кэргэн бэлиитикэтин департаменын салайааччытын солбуйааччы: «Бу билиҥҥи кэмҥэ ирдэниллэр идэлэргэ үөрэнэр буоллаҕына диэн. Бу идэлэри бырабыытылыстыба дьаһалынан бигэргэтиллэр. Ол курдук, сиэстирэ идэтигэр, сварщик, алын кылаас учуутала уонна уһуйаан идэтигэр үөрэнэр буоллахтарына кинилэргэ төлөбүр көрүллэр буолар».
Элбэх оҕолоохторго коммунальнай төлөбүрдэригэр 30% чэпчэтии көрүллүөҕэ, ол иһигэр кытаанах уматык, ыраас уонна тобох ууну тиэйии, соцнайм дуогабарынан олоруу уонна капитальнай өрөмүөн төлөбүрэ эмиэ киирсэр. Сайабылыанньаны балаҕан ыйын маҥнайгы күнүттэн туттарыахха сөп буолуоҕа. Төлөбүр, сайабылыанньа киирбит күнүттэн 12 ый устата Олохтоох картатын суотугар түһүөҕэ.
Ольга Протодьяконова, СӨ субсидия агентствотын нэһилиэнньэни кытта үлэлиир салаатын салайааччыта: «Ыал элбэх оҕолоох дьиэ кэргэн диэн статустаах эрэ буолабакка, социальнай өйөбүл миэрэтин ылар эмиэ бырааптаах буолара ирдэниллэр. Ол курдук, манна киирэллэр: 3 уонна онтон элбэх оҕолоох 18 саастаарыгар диэри, эбэтэр 23 саастарыгар диэри күнүскү үөрэх тэрилтэтигэр үөрэнэр, ону таһынан армияҕа суһал сулууспалыыр оҕолоох дьиэ кэргэн».
Бэлиэтээн эттэххэ атын социальнай миэрэлэри аныырга бу төлөбүр кээмэйэ учуоттанар. Ол курдук, саҥа чэпчэтиини ылбыт дьиэ кэргэн дохода үрдээбититтэн, атын пособиелары ылар быраабын сүтэриэн эбэтэр кыччатыан сөп.
Ольга Протодьяконова, СӨ субсидия агентствотын нэһилиэнньэни кытта үлэлиир салаатын салайааччыта: «Сайабылыанньаны икки ньыманан бэриллэр. Бастакы: сайабылыанньаны уонна докумуоннары “Мои документы” кииннэргэ тиийэн бэриллэр. Иккис: электроннай, эрэгийиэннээҕи судаарыстыбынай өҥө порталынан e-yakutia.ru нөҥүө».
Чэпчэтии биир эрэ дьиэҕэ көрүллэр, маны таһынан ыал олох-дьаһах коммунальнай ороскуоттарын төлөһүөхтээх, эбэтэр иэс мунньуллан тута төлөнөр кыах суох буоллаҕына өҥөнү оҥорооччулары кытта дуогабар түһэрсэн чэпчэтиигэ хапсыан сөп.
