Саха сирин олохтоохторо биир нэдиэлэ иһигэр 23 мөл. кэриҥэ суумманы түөкүттэргэ албыннаттылар

Түөкүттэр дьон өйүн сүүйэр ньымалара сайда турар. Харчыга наадыйар дьону хабалаҕа киллэрэн, хас эмэ мөлүйүөҥҥэ албынныыллар. Ол эрээри силиэстийэ салаата син биир суолларын сойуппакка түөкүттэри тутаталыыр. Ааспыт сэттэ ый түмүгүнэн Саха сиригэр 1200-тэн тахса түөкүннээһин быһыыта бэлиэтэннэ. Оттон баан хаартатыттан харчы уорааһын 378 быһыыта таҕыста. Ол курдук уопсай хорумньу 641 мөл. тахса солкуобайга тэҥнэстэ.

Валентин Удинов, СӨ ИДьМ пресс-сулууспатын референэ: «Маннык түөкүннээһин быһыылара күннэтэ тахса тураллар Сахабыт сиригэр. Ол курдук, ааспыт нэдиэлэҕэ Мииринэй олохтооҕо түөкүттэргэ 8,8 мөл. солк. былдьатта».

Ис дьыала министиристибэтин үлэһиттэрэ күннэтэ араас сэрэтэр-өйдөтөр үлэлэри ыыталларын үрдүнэн, түөкүттэр угаайыларыгар киирэн биэрии түбэлтэтэ аччаабат. Дьон харчытын уоран байар-тайар баҕа санаалаахтар эрийэн тиийэн араас инвестициялары көҕүлээн, киһи өйүгэр баппат харчыны өлөрүөххүтүн сөп диэн албыннаатахтарына дьон итэҕэйэн, чахчы түргэн харчыны өлөрүөххэ сөп эбит дии саныыллар. Дьокуускай куорат олохтоохторуттан түөкүттэргэ төһө киирэн биэрэллэрин ыйытыластыбыт.

Өскөтүн билбэт нүөмэргититтэн полиция, баан эбэтэр сотовай оператор үлэһитэбин диэн эрийдэхтэринэ тутатына төлөпүөҥҥүтүн ууран баран тустаах исписэлиистэргэ эрийэн туоһулаһар буолуҥ, түөкүттэр кубулунар буолуохтарын сөп диэн ИДьМ үлэһиттэрэ сэрэтэллэр. Бу курдук холку ирдэбили тутуспат буоллахха ытыс соттон хаалар куттала хас да бүк элбиир.

Валентин Удинов, СӨ ИДьМ пресс-сулууспатын референэ: «Угуйууларга итэҕэйимэн. Ити барыта түөкүттэр тарҕатар ньымалара буолаллар. Уонна онно-манна Интернет ситимигэр бэйэҕит төлөпүөҥҥүт нүөмэрин, ааккытын, баан хаартатын нүөмэрин хааллара сылдьыман».

Сылтан-сыл дьон-сэргэ хараҕын баайан, өйүн булкуайан түөкүттэн нэһилиэнньэттэн харчы уорар, угаайыга киллэрэр ньымалара сайдан иһэр. Ону статистика бэйэтэ туоһулуур. Былырыыҥҥы сыл иһигэр уопсай хорумньу 946 млн. солкуобайтан тахса этэ. Оттон быйыл 7 эрэ ый устата 641 млн. тэҥнэстэ. Онон аҕа саастаах дьонноргутун күн аайы сэрэтиҥ, хас да бүк болҕомтолоох буолуҥ.