Нам улууһугар аан бастакытын выпусктар спартакиадалара буолан ааста

Нам ытык сиригэр - Эҥсиэли хочотугар спорт бырааһынньыга. Оттон бу тэрээһин ураты. Спортсменнар оскуоланы араас сылларга бүтэрбит выпусктар. Аан бастакытын чөл олоҕу уруйдуур спартакиада Нам улууһун киинигэр ыытыллынна.

2018 сыллаахха 1983 сыллаах выпусктар бастакы бэйэлэрин түмсүүлэрин тэриммиттэрэ. Кинилэр ахсааннара 15 тыһ. тахса этилэр. Салгыы кинилэртэн холобур ылан, өссө 5 выпуск түмсүүлэрэ тэриллэннэр, күн бүгүн бүтүн Өрөспүүбүлүкэтээҕи хамсааһын баар буолла. 1977-94 сыллаахтарга сотору кэминэн аны 1995-96 сыллаахтар киириэхтэрэ.

Волейбол көрүҥэр дьиҥ тыҥааһыннаах киирсиилэр аастылар. Манна кыттааччылар ох курдук бэлэмнээхтэрин көрдөрдүлэр. Өрө күүрүүлээх, кытаанах киирсиилэр түмүктэринэн волейболга 1979 сыллаахтар иннилэрин кимиэхэ да биэрбэтилэр. Оттон бу "Төлөннөөх" диэн ааттаах выпусктар саамай элбэх буолан түмүллэн кэлбиттэрин киһи сэргии көрөр. Успуордунан эрэ муҥурдаммакка тустаах көлүөнэ түмсүүтэ Өрөспүүбүлүкэ уопсастыбынай олоҕор көхтөөхтүк кыттар.

Мария Ховрова, Республикатааҕы 1979 сыллаах выпусктар түмсүүлэрин салайааччыта: «Икки иистэнэр массыына бэлэхтээбиппит, сиэккэ өрүүтүгэр уонна ууга барбыттарга харчы хомуйаммыт Хатырыкка кэлэн субуотунньуктаабыппыт».

Успуорт бырааһынньыгар уопсайа 5 көрүҥҥэ күрэхтэр аастылар. Волейболга, ох саанан ытыыга, дартска уонна корнхоллга. Маныаха үҥкүүгэ уонна ырыаҕа. Итини таһынан көлүөнэлэри ситимниир тэрээһиҥҥэ сыл устата бу курдук уопсастыбынай олоххо көхтөөхтук кыттыбыт дьону наҕараадалаатылар. 

Альберт Соров, 1977-1994 с.с. выпусктар түмсүүлэрин салайааччыта: «Сыл аайы оҥорор этибит көлүөнэ көрсүһүүтүн. Быйыл хамсааһыммыт көрүҥүн уларытаммыт билигин улуустарынан буолабыт. Киһи сэҥээрэрэ диэн эһиил маннык бэстибээли Чурапчылар ылабыт диэбиттэрэ. Кинилэр кэннэ атын улуустар ылабыт диэтилэр. Онон выпуск хамсааһына, түмсүүлэрэ, дьоннорун-сэргэлэрин сэргэхсэтэргэ үгүс үлэни ыыталларыгар биһи үөрэбит».

Онон эһиилги маннык спартакиада Чурапчы улууһугар ыытыллыаҕа. Оттон бүгүҥҥү тэрээһин чахчы көлүөнэлэри ситимнээтэ.

Татьяна Левина, 1981 сыллааҕы выпуск түмсүүтүн салайааччыта: «Сылын аайы тэрээһиннэри ыытабыт, бастаан бэйэбитигэр. Оҕолорбут бэйэ бэйэлэрин билсэллэр уонна тэрээһиннээх түмсүүлэр буолаллар».

Бу курдук ураты тыыннаах Спартакиада Нам улууһугар үрдүк таһымнаахтык 3 күн устата ыытыллынна. Выпусктар оҕо, оскуола  саастарын санаан үөрэн-көтөн тарҕастылар.