Саха сиригэр ааспыт нэдиэлэҕэ 105 итирик суоппар тутулунна

Атырдьах ыйын 11 күнүгэр түүн 11 чааска Марха стеллатыгар "Тойота Витц" массыына баран түстэ. 1989 сыл төрүөх суоппар Марха дьоҕус түөлбэ диэки айан суолун тутан иһэн уруулун кыайан туппакка суолтан көппүт.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: «Тимир көлө иһигэр олорсон испит киһини суһал көмө үлэһиттэрэ балыыһаҕа илдьэ барбыттара. Онтон суоппар эчэйиитэ улахан буолан суол саахала буолбут сиригэр күн сириттэн туораабыт. Хомуйуллубут матырыйааллар следственнай уорганнарга бэриллибиттэрэ».

Бу соҕотох сырыы буолбатах. Кэнники кэмҥэ суолга быһылаан тахсара элбээтэ диэн бэлиэтииллэр. Покровскайга түргэн тэтимнээх сырыы түмүгэр массыына төкүнүйдэ. Олорсо сылдьыбыт киһи суһал көмө кэлиэр диэри миэстэтигэр суорума суолланна. Оттон массыына суоппарын Хаҥаластааҕы балыыһаҕа ыарахан туруктаах тиэртилэр.

Күннэй Иванова, СӨ суолга-иискэ куттала суох буолууну хааччыйар судаарыстыбаннай инспиэксийэ пропагандаҕа аҕа инспиэктэрэ, полиция майора: «Оскуорас тутуспат буолуу көрүллэр уонна суолбут усулуобуйата мэһэйи оҥорор».

Кэнники кэмҥэ оҕо кыттыылаах сааххал тахсар түгэнэ элбээбитэ бэлиэтэнэр. Онон оҕолор суолга тахсалларыгар өйдөтөр уонна сэрэтэр үлэлэри ыытар тоҕоостоох диэн Госавтоинспекция үлэһиттэрэ төрөппүттэргэ сүбэлииллэр.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: «Икки бэлисипиэтинэн сылдьар оҕолору түннэри көтүү тахсыбыта Кузьмина уулуссаҕа уонна Табаҕа сэлиэнньэ киириитигэр. Оҕолор 13 уонна 14 саастаахтар. Биирдэригэр дьиэтиттэн сылдьан эмтэниини анаабыттар онтон биирдэрэ балыыһаҕа төбөтүн эчэтэн нейрохирургия отделениятыгар сытар».

Быйыл Өрөспүүбүлүкэ үрдүнэн сыл саҕатыттан киһи эчэйиилээх 410 суол сааххала таҕыста, 45 киһи сырдык тыына быһынна, 532 киһи араас эчэйии ылла. Бу хомолтолоох статистика күн-түүн эбиллэ турар. Онон суолга-иискэ хас да бүк сэрэхтээх буолар ирдэнэр.

Күннэй Иванова, СӨ суолга-иискэ куттала суох буолууну хааччыйар судаарыстыбаннай инспиэксийэ пропагандаҕа аҕа инспиэктэрэ, полиция майора: «Убаастабыллаах суоппардарга этиэхпин баҕарабын, оскуораскытын тутуһан айанныыргытыгар уонна дистанцияны тутуһуохха наада. Бэйэҕитин анал харыстыыр кургутун иилинэргитин умнумаҥ. Ону тэҥэ, сатыы сылдьааччы дьон эмиэ сүрдээх болҕомтолоох буолуохтарын наада. Анал туоруур сиринэн эрэ туоруохха наада».

Суолга сааххал тахсар сүрүн түрүөтүнэн аһыы утаҕы иһии буолар. Ааспыт нэдиэлэ иһигэр 105 киһи итирик туруктаах тимир көлөҕө олорбута бэлиэтэннэ. 14 суоппар иккис төгүлүн тутулунна.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: «Суоппар итирик туруктаах тутулуннаҕына 12.8 КОАП РФ ыстатыйатынан бастаан 30 тыһ. ыстыраап буолар уонна суоппар быраабыттан быһаллар. Онтон иккистээн тутулуннаҕына уголовнай эппиэтинэс буолар».

Күһүҥҥү күннэр чугаһааннар халлаан хараҥарар кэмнэрэ саҕаланнылар. Онон суоппардар уонна сатыы сылдьааччылар суолга-иискэ болҕомтолоох уонна сэрэхтээх буолуҥ диэн Госавтоинспекция үлэһиттэрэ сэрэтэллэр.