ХИФУ ботаническай саада үгэс быһыытынан эгэлгэ үүнээйини хото олордор

Саха сирин тутаах үөрэҕин кыһатын - Хотугулуу-Илиҥҥи федеральнай университет ботаническай саадыгар билигин маассабай сибэккилээһин үгэнэ буолан ураты көстүү тулалыыр. Эриэккэс бэйэлээх үүнээйи, мааны сибэкки үүнэн-силигилээн туралларын көрүөххэ астык. Эгэлгэ өҥнөөх сибэкки баарын көрөн киһи сөҕөр-махтайар эрэ. Маҕан, саһархай, розовай, бордовай, кыһыл. Бу декоративнай үүнээйилэр учаастактара. Манна барыта 60-тан тахса Саха сиригэр эрэ буолбакка, атын эрэгийиэннэртэн кэлбит күөх үүнээйилэр көрүҥнэрэ үүнэн чэлгийэ тураллар.

Александра Ермолаева, ХИФУ ботаническай саадын декоративнай салаатын салайааччы: «Пион 3 көрүҥэ, ирис 20 көрүҥэ баар. Бэйэбит үүнээйилэрбититтэн сүтэн эрэллэри элбэтиннэрэбит».

Бу кэрэ барыта улахан үлэ түмүгэ. Александра Ермолаева ботаническай саадка үлэлээбитэ 10-тан тахса сыл буолла. Кини этэринэн, биллэн турар көрүү-истии улахан суолтаны ылар. Саамай сүрүнэ диэн сыыс окко былдьаппакка, уутун кыайыахха наада, ону тэҥэ араас үөнтэн-ыарыыттан харыстаан эрдэ эмтиир наада. Саха сирин саамай кэрэ сибэккитэ сардаана сибэкки эмиэ үүнэн чэлгийэн турар. Хойутуу тыыллар суортара сибэккилээн хойукка диэри турар кыахтаахтар. Лилия бу азиатский гибрид диэн көрүҥэ биһиги усулуобуйабытыгар үчүгэйдик кыстыыр буолан сыллата сибэккилиир. Быйыл декоративнай үүнээйилэр участактарыгар өссө биир саҥа саад баар буолла.

Людмила Кралина, ХИФУ ботаническай саадын агронома: «Бу учаастак саҥа арылынна. “Прованс” диэн романтическай толкуйдаах оҥорбуппут. 100-чэкэ үүнээйи көрүҥэ баар».

Бу кэрэ үүнэйилэри саад агронома Людмила Кралина көҕүлээһининэн, бүөбэйдээн, көрөн-истэн үүннэрэн таһаардылар. Людмила ботаническай саакка үлэлии киирбитэ сылтан эрэ орто. Ол эрэн номнуо ылсан саад биир ураты учаастагын оҥорон, салгыы өссө тупсарар киэҥ былааннаах. Манна барытыгар уонтан тахса киһи күннэтэ үлэлиир-хамныыр, бу үүнээйилэри көрөр-истэр. Бу фиолетовай өҥнөөх бастаан көрдөххө лаванда курдук, шалфей, розовай сальвиа, флокстар, дербенник, лабазник курдук үүнээйилэр ураты көстүүнү бэлэхтииллэр.

Лидия Атласова, Тулагы-Киллэм нэһилиэгин олохтооҕо: «Мантан атыылаһабыт уонна бэйэбит үүннэрэбит».

Баҕалаах дьоҥҥо анаан манна күннэтэ экскурсия тэрийэллэр. Бу “Прованс” учаастагар дьон кэлиитэ көхтөөх. Ким кэлэн көннөрү көрөр-сынньанар, хаартыскаҕа түһэр, ким атыылаһан дьиэтигэр олордор.