Айсен Николаев Үөһээ Бүлүүгэ социальнай эбийиэктэр тутууларын көрдө

Өрөспүүбүлүкэ Ил Дархана Айсен Николаев көтөр аалга киирэн, ойуур баһаара муҥуутаан турар сиригэр оперативнай бөлөҕү кытары көтөр. Уоту утары охсуһааччылар, суһал ыстаап үлэһиттэрэ тутатына Өрөспүүбүлүкэ баһылыгар үөскээбит быһыыны-майгыны кэпсээтилэр. Салгыы Айсен Сергеевич илэ хараҕынан баһаары үөһэттэн көрдө.

Миэстэтигэр тиийэн көтөр аал сири булар. Ил Дархан уоту утары охсуһа сылдьар байыастары кытары көрсөн, кинилэр санааларын иһиттэ, үлэ хаамыытын билистэ. Соруктарын туруорда. Оттон манна даҕатан эттэххэ, билигин Үөһээ Бүлүүгэ балаһыанньа судургута суох. Сайын устата күүстээх ардах түспэтэ. Ардах суоҕа, кураан уонна тыал уот тарҕаныытын төрүөтүнэн буолла. Баһаардар бары кэриэтэ нэһилиэнньэлээх пууннарга чугаһаабыттара эрээри, туруу байыастар баар буоланнар биир да сэлиэнньэ эмсэҕэлээбэтэ.

Михаил Степанов, "Авиалесоохрана" Үөһээ Бүлүүтээҕи салаатын парашютист–баһаарынайа: «Тохсус баһаарбытыгар кэллибит. Номнуо улааппыт этэ. Балаҕат диэн сиртэн Эбэҕэ дылы 3км кэлбиппит, өссө 5,5 км ситэри көнөтүк барыахтаахпыт».

Билигин манна миэстэтигэр 100-тэн тахса киһи үлэлиир. Айсен Николаев сылдьыбыт, Бүлүү кыраныыссатын учаастагар 6 парашютист уонна олохтоох уолаттар үлэлии сылдьаллар. Ил Дархан уоту утары охсуһааччыларга махтанна, үлэлэрин үрдүктүк сыаналаата.

Айсен Николаев, СӨ Ил Дархана: «Хас да ыйынан үлэлээбит уолаттар бааллар, Өрөспүүбүлүкэҕэ буолбут улахан баһаардарга. Сөптөөх этиилэри эттилэр, тустаах салайааччыларга сорудах курдук туруордум. Үөһээ Бүлүү өттүгэр сүрүнэ дэриэбинэлэргэ, экэниэмикэ эбийиэктэригэр мантан улахан хорумньу таһаарыа суохпут диэн эрэллээхпит».

Ил Дархан 3 күннээх оробуочай сырыытыгар улахан болҕомтотун социальнай эбийиэктэри тутууга уурда.  Бастакы күн тута Үөһээ Бүлүү улууһун киининэн хаама сылдьан, Исидор Барахов искибиэрин тутулла сылдьар миэстэтин көрдө, үлэһиттэри кытары кэпсэттэ. Салгыы 10 тыһ. кв.м. иэннээх сиргэ култуура уонна искусство дыбарыаһа тутуллуохтаах миэстэтин көрдө.

Салгыы Ил Дархан Нам нэһилиэгин Хомустаах сэлиэнньэтигэр айаннаан тиийэн, хас эмэ сылы быһа туттулла сатыыр култуура киинин эбийиэгин көрөн, улуус уонна култуура министиэристибэтиттэн үбүлэнэн булгуччу үлэҕэ киирэри сорудахтаата. Оттон Исидор Барахов төрөөбүт дойдутугар Харбалаах нэһилиэгэр тиийэн эмиэ култуура киинин тутуутун хаамыытын көрдө. Бэйэтин сыанабылын биэрдэ.

Маныаха, тыа хаһаайыстыбатын улахан, сүбэ мунньаҕа Ил Дархан кулун тутарга таһаарбыт "Олохтоох бэйэ оҥорууну уонна туризмы сайыннаарыы" ыйааҕынан ыытыллынна. Манна улахан суолталаах кэпсэтиилэр, дьүүллэһиилэр аастылар.

Айсен Николаев, СӨ Ил Дархана: «Сыала-соруга – элбэх бородууксуйаны оҥорон Саха сирин олохтоохторун ол бородууксуйанан хааччыйыахтаахпыт диэн. Хайдах туһалаахтык Өрөспүүбүлүкэ биэрэр харчытын туһанабытый диэҥҥэ кэпсэтии таҕыста».

Маны кытары Айсен Сергеевич Үөһээ Бүлүү баһылыгын Валерий Николаевы кытары көрсөн, улуус сайдыытыгар туһуламмыт сорудахтары биэрдэ.