Өлүөнэ өрүскэ 250 тыһ. тахса араас балык ыамын ыытыахтара

Балык собуотун үлэһитэ Григорий Осипов күннээҕи үлэтин түбүгэ. Балык бассейнын күннэтэ киртэн-хахтан ыраастыыр. Үрдүк үөрэхтээх биолог идэлээх, бастакы категориялаах рыбовод дуоһунаһыгар үлэлээбитэ сылтан орто. Эдэр киһи Хотугулуу-Илиҥҥи федеральнай университет айылҕа үөрэҕин институтун бүтэрэн дойдутугар кэлэн үлэлии сылдьар.

Григорий Осипов, "Главрыбвод" тэрилтэ Саха сиринээҕи филиалын 1-кы категориялаах рыбовода: «Билигин хатыыс иитэ сылдьабыт. Күннээҕи үлэбит бассейн сууйаааһына. Уулара киртийдэҕинэ өлөн хаалыахтарын сөп. Онтон ураты күн аайы аһатабыт».

Аһатыы үлэтэ күннэтэ ыытыллар. Бу курдук ньуоска тутуурдаах сылдьан хас биирдии бассейыны кэрийэн, балыктары аһаталлар. Астарын нуормата балык төһө улааппытыттан тутулуктаах.

Сыах ыам ыйыгар Өлүөнэ өрүскэ сордоҥу ыыппыта. Аны билигин хатыыс ыамын улаатыннара сылдьаллар. Быйылгы сылга 253 тыһыынчаттан тахса балыгы ыытар сорук турар. Промышленнай хампаанньалар сакаастарынан өрүс балыгын толуйууга үлэлэһэллэр.

Владимир Бурцев, "Главрыбвод" тэрилтэ Саха сиринээҕи филиалын салайааччытын солбуйааччы: «Сибиир хатыыстарын искэх эрдэхтэринэ аҕалбыппыт. От ыйа 29 чыыһылатыгар ыытабыт. Эһиил кыһыҥҥыга көһөбүт чыыр, чорбоҕор иитэр буолабыт».

Балык собуота Улахан Ааҥҥа 2018 сыллаахтан ыла үлэлиир. Нэһилиэк турар сирэ табыгастаах буолан, өрүс үрдүгэр олорон эрэ балыктарын улаатыннараллар, элбэтэллэр. Сыах хара тэриллиэҕиттэн олохтоох дьону үлэҕэ ылан, нэһилиэккэ үлэ миэстэтин таһаарар. Балык собуота өссө да кэҥиир, сайдар былааннаах.

Александр Алексеев, Хаҥалас улууһун 2-с Малдьаҕар нэһилиэгин баһылыга: «Күн-бүгүн биһи нэһилиэкпититтэн 5 уол үлэлии сылдьар. Росрыболовствоны кытта үлэлэһэн бэйэ уолаттарыбытын үөрэттэрэн манна үлэлии кэлэллэр. Бу бырайыак бэдэрээлинэй экспетизаны ааһан турар, онон үбүлээһинэ табылыннаҕына собуоппут өссө кэҥиэхтээх».

Собуот балыктары аны от ыйын 29 күнүгэр ыытыаҕа. Манна тыһыынчаннан хатыыс ыамата Өлүөнэ өрүскэ олохсуйан, салгыы төрүө-ууһуо. Сыах билигин 3 тэрилтэни кытары дуогабар түһэрсэн олорор. Онон өссө да былаан киэҥ.