Европа бастыҥнарын көрүстүлэр

Ыһыы-хаһыы дойдуларыгар кэлэн долгуйбут уолаттары өссө уйадытта. Күннээх алаадьы, быырпах - барыта саха көрсүүтүн сиэринэн буолла. Уолаттар бастакы улахан үрдэллэрин дабайан саамай чугас дьоннорун көрсөн үөрдүлэр.

Саха бөҕөстөрүн көрсө спорт миниистирэ, тренердэр, биир дойдулаахтара, доҕотторо уонна биллэн турар саамай тутаах дьоно - төрөппүттэрэ кэллилэр. Амма улууһуттан элбэх оҕолоох дьиэ кэргэн Мидловецтар уолларын көрсө киирдилэр. Күрэхтэһии ыттылларын тухары долгуйан утуйбакка, түүннэри телевизоры манаан олорбуттарын туһунан кэпсээтилэр.

Матрёна Мидловец, Андрей Мидловец ийэтэ: "Олус күүскэ үөрбүппүт. Ыһыы-хаһыы бөҕө буолбуппут. Үөрүүбүтүттэн ытаан ылбыппыт".

Павел Мидловец, Андрей Мидловец аҕата: "Үөрүүбүттэн олус күүскэ хаһыытаабытым. Бэртээхэй кыайыы".

Спорду таптааччыларга улахан үөрүүнү бэлэхтээбит уолаттар эдэр оҕолорго эрэл кыымын сахтылар. Ардаҕы быыһынан доҕотторун көрсө үгүс оҕо кэллэ.

Саха сириттэн Арассыыйаҕа бастыыр иһин күрэххэ 5 уол миэстэлэһэн кэллэ - бу саха спордугар элбэх эрэли бэлэхтиир уолаттар тахсан эрэллэрин туоһулуур диэн спорт миниистирэ кэпсээтэ.

Леонид Спиридонов, СӨ спорт миниистирэ: "Саха сирин историятыгар бастакытын Европа чемпионнара кэллилэр. Эдэр спортсменнарбытыгар кыайыы өрөгөйө быйыл кэллэ. Ол курдук россияҕа бастыыр иһин чөмпүйэнээккэ биэс мэтээл аҕалан үөрдүбүтэ".

Лев Павлов 57 киилэҕэ Италия, Грузия, Армения уонна финалга Азербайджан бөҕөһүн кытта көбүөргэ таҕыста. Васиф Багировы утары хапсыһыыга бастаан 4 баалы утарылаһааччытыгар биэрбитэ, оттон кэники хомуллан 8-6 ахсааҥҥа кыайан, сахаларга бастакы көмүс мэтээли суруйбута.

Лев Павлов, Европаҕа бастыыр иһин чөмпүйэнээт кыайыылааҕа: "Чиэһинэ эттэххэ, түмүк оҥоро иликпин. Билигин дьиэбэр тиийиэхпин эрэ баҕарабын. Киирсии барыта ыарахан этэ".

Андрей Мидловец 61 киилэҕэ бэйэтин ыйааһынын биир бастыҥ тустуугун Азербайджантан сылдьар Джамал Аббасов  утары тахсыбыта. Хапсыһыы түмүгэр биир даҕаны утарылаһааччыга кыайыыга биир да түгэни биэрбэккэ 6-1 ахсааҥҥа эрэллээх кыайыыны сурунан, Европа таһымыгар сүрэхтэннэ. Хас биирдии хапсыһыы ыараханнык ааспытын кэпсээтэ.

Андрей Мидловец, Европаҕа бастыыр иһин чөмпүйэнээт кыайыылааҕа: "Киирсии барыта ыарахан этэ. Европа буолан хомулларга эмиэ уустук соҕус этэ. Бүгүн олус үчүгэйдик көрүстүлэр, махталбын тириэрдэбин".

Уолаттар бу 19 чыыһылаттан Кисловодскайга хомуурга барыахтара. Бу хаалбыт күҥҥэ дойдуларыгар тахсан күүс-сэниэ ылар баҕа санаалаахтар.