Быйыл үөрэххэ туттарсыы үрдүк куонкурустаахтык ааһар

Аныгы үйэ тэтиминэн оҕолор улахан аҥаардара интернет ситиминэн үөрэххэ туттарсан киирэллэр, оттон ордук кыһамньылаах абитуриеннар илэ миэстэтигэр кэлэн, барытын туоһулаһан аттестаттарын хааллараллар. Ньурба улууһун Маалыкайыттан сылдьар Александра Николаева нуучча тылын, литэрэтиирэтин бакылтыатыгар киирээри докумуонун аҕалла. Кыра эрдэҕиттэн учуутал идэтигэр үөрэнэр баҕатын сойуппакка, улахан баҕатыгар биир улахан хардыытын оҥордо.

Александра Николаева, үөрэххэ туттарсааччы: "Олус долгуйабын, олус кэтэһэбин. Тыл өттүгэр кырабыттан тардыы баар. Оҕо эрдэхпиттэн учуутал буолуохпун баҕарар этим. Ол иһин эрдэттэн быһаарыммытым".

Тылга бастыҥ исписэлиистэри бэлэмнээн таһаарар саха тылын хаапыдарата быйыл бакалавриакка 10 миэстэни арыйда. Билигин үөрэх систиэмэтэ уларыйан, киһи учуутал эрэ идэтин буолбакка, тыл ирдэнэр хайысхатыгар барытыгар үлэлии киириэн сөп. Бу туһунан саха тылын хаапыдыратын сэбиэдиссэйэ Дария Чиркоева кэпсээтэ.

Дария Чиркоева, тыл билимин хандьыдаата, саха тылын хаапыдыратын сэбиэдиссэйэ: "Устудьуон баҕата өрө тутуллар буолла. Онон кини ол баҕатынан ханнык баҕарар идэни ылыан сөп. Холобур, биир идэҕэ киирэн баран, эбии хас да идэни талан биһиги университеппытыгар үөрэниэн сөп".

Медицинэ үнүстүүтүгэр быйыл 260 үөрэх миэстэтэ көрүлүннэ, онтон 170-на тус сыаллаах үөрэх миэстэтэ буолар. Бүгүҥҥү күҥҥэ 1500 кэриҥэ киһи докумуоннарын туттарда. Онон, быйылгы дьылга хаһааҥҥытааҕар даҕаны күүстээх күрэх бу үнүстүүккэ буола турар. Оттон математика уонна информатика үнүстүүтүгэр туттарса кэлбит Виталий Крылов биир кэлим эксээмэннэрин ситиһиилээхтик туттаран бастакҕы үөрэҕэр докумуоннарын аҕалла. Кылааһыгар сэттэ киһиттэн соҕотох профильнай математиканы туттарбытын үллэһиннэ.

Виталий Крылов, үөрэххэ туттарсааччы: "Мин соҕотох профильнайы талбытым. Кылааспытыгар сэттиэбит. Математика, информатика уруогун сөбүлүүр этим".

Университет үрдүнэн быйыл уопсай миэстэ 10 бырыһыана, ол эбэтэр 356 туспа уонна анал квота көрүлүннэ. Анал квотаҕа билиҥҥи туругунан 40-тан тахса оҕо киирдэ. Бу манна инбэлииттэр, тулаайахтар киирсэллэр. Оттон туспа квота туһунан киин тутар хамыыһыйа эппиэттээх сэкирэтээрэ иһитиннэрдэ.

Елизавета Ильина, М. К. Аммосов аатынан Хотугулуу-Илиҥҥи бэдэрээссийэлии үнүбэрсиэт киин тутар хамыыһыйатын эппиэттээх сэкирэтээрэ: "Туһунан квотаҕа анал байыаннай дьайыы кыттыылаахтара эбэтэр кинилэр оҕолоро туттарсаллар. Оннук 30-40 ыччат туттарса сылдьар. Сорохторо эскээмэнэ суох киирэллэр эбэтэр манна миэстэтигэр эксээмэн тутараллар. Холобур, биир кэлим эксээмэннэрин түмүгэ кыра да буоллаҕына манна эксээмэн туттарар бырааптаахтар".

Магистратураҕа устудьуоннары ылыы от ыйын 1-кы күнүттэн саҕаламмыта. От ыйын 20 күнүгэр диэри туттарсааччыллары үөрэх сүрүн куорпуһугар ГУК 1-кы, 2-с этээһигэр күүтэллэр. Уонна тастан үөрэххэ киириигэ сүрүн ирдэбиллэри саайка киирэн көрүҥ.