Дьокуускайга аан дойдутааҕы киинэ бэстибээлэ түмүктэннэ

Уоттаах-күөстээх, чаҕылхай киэһэ Саха тыйаатырыгар ньиргийдэ. 7-с аан дойдутааҕы киинэ бэстибээлэ үрдүк таһымҥа түмүктэннэ. Бүтэһик тыллар, эҕэрдэлэр, ис сүрэхтэн тахсар тыллар мустубут дьону долгутта.

Утуу-субуу бииртэн-биир кыайыылаах аата ааттанар. Ытыс тыаһыгар уйдаран киинэ эйгэтин үлэһиттэрэ тахсаллар. Өрүүтүн буоларын курдук долгутуулаах күүтүү, соһуччу үөрүү, көрөөччү өйөбүлэ саала иһин толорор. Аан бастакыннан "бастыҥ эр киһи оруолун" толоруу иһин үрдүкү наҕарааданы "Тимир" киинэҕэ оонньообут Георгий Бессонов ылла. Киниэхэ көрөөччү элбэх куолаһы биэрдэ.

Итиэннэ саха киинэтин үлэһиттэригэр Өрөспүүбүлүкэ наҕараадаларын туттардылар. Саха өрөспүүбүлүкэтин култууратын үтүөлээх үлэһитин ааты Семен Аманатов ылла. Кини өр сыллар устата киинэ операторынан үлэлээтэ, онтон быйылгы бэстибээлгэ аан бастакытын "Кыталыктаах кырдалым" киинэнэн продюсер быһыытынан кытынна.

Семён Аманатов, киинэ оператора, продюсера: «Бу киинэни Аммаҕа устубуппут. Ол иһин сирин-уотун дьонун-сэргэтин билэбин. Продюсер быһыытынан басткы холонуум».

Киинэ бэстибээлигэр күрэхтэр көрдөрүүлэригэр 2754 киһи сырытта, онтон анал көрдөрүүлэргэ 574, үөрэх бырагырааммаларыгар 740 киһи кэлэн араас лекциялары иһиттилэр. Итиэннэ атын дойдулары кытары хардарыта үлэлэһэргэ, үтүө сыһыаны олохтуурга олук уурулунна.

Афанасий Ноев, СӨ духуобунай сайдыыга уонна култуураҕа миниистирэ: «Бу бэстибээл уратыта диэн устудьуоннар үлэлэрин көрүү буолла. Онон Саха сирин интириэһэ диэн биһиги ыччаттарбытын өссө дириҥник киинэнэн дьарыктаналларыгар үөрэтиэхтээхпит, сайыннарыахтаахпыт».

Бэстибээлгэ уопсайа 9 киинэ сүүмэрдээһини ааһан кыттыыны ылла. Барыта 17 араас дойдуттан 25 киинэ көрдөрүүтэ буолла. Тас дойдуттан, атын регионнартан ыҥырыллан кэлбит дьүүллүүр сүбэ чилиэттэрэ бары бэстибээл үрдүк таһымын, киинэлэр уратыларын  бэлиэтииллэр.

Дмитрий Пермяков, дьүүллүүр сүбэ чилиэнэ: «Фестиваль получился хороший. Ура! Так держать, надо продолжать в том же духе. На самом деле было очень здорово. Спасибо програмному директору за набор таких разных фильмов, но в выборе победителей жюри было единодушно».

Муҥутуур кыайыылааҕынан, бастыҥ киинэнэн режиссер Михаил Лукачевскай "Кыталыктаах кырдалым" киинэтэ ааттанна. Манна дьүүллүр сүбэ биир санаанан куоластарын биэрэн Саха киинэтэ үрдүкү чыпчаалга таҕыста.