"Азия оҕолоро". Мини-футбол күрэҕэ ыытылынна

Идэтинэн физкультура учуутала, футболу сэҥээрээччи Николай Федоров сиэннэринээн Өлүөнэ эбэни нөҥүөлээн, анаан-минээн мини-футболга күрэхтэри көрө кэлбит. Сиэннэрин кыра эрдэхтэн спортка сыһыарыыта “Азия оҕолоруттан” саҕаламмыт.

Николай Фёдоров, Уус-Алдан улууһун олохтооҕо: «Уус Алдан Уһун Күөлүттэн сылдьабыт. Сиэннэрим футбол сөбүлүүллэр, ол иһин көрө кэллибит. Саха сирин хамаандатын кэтэһэбит. Бэлэмнэрэ үчүгэй. Бэйэм физкультура учууталабын, оҕолорбун оонньотобун ол иһин интириэһиргээн кэлэн көрө олоробут».

Мини-футболга эрчиллиилэр уонна бастакы күрэхтэр бэс ыйын 26 күнүттэн саҕаламмыттара. Тыҥааһыннаах киирсиилэр түмүктэринэн Урал бэдэрээлинэй уокуруга сүүмэрдэммит хамаандатын футболистара тахсыбыттара. Бүгүн киэһээ кинилэр биһиги Өрөспүүбүлүкэбит хамаандатын кытары бастакы миэстэ иһин күөн көрсүөхтээхтэр.

Бу спорт көрүҥэр тас дойдуттан хамаандалар Кыргызстан уонна Узбекистан футболистара үчүгэй оонньууну көрдөрдүлэр. Уопсайынан тэрийээччилэр бэлиэтииллэринэн хамаандалар күүстээхтик, ох курдук оҥостон кэлбиттэр.

Ариан Тарасов, "Азия оҕолоро" оонньуу кылаабынай судейскай кэллиэгийэтин кылаабынай сэкэрэтээри солбуйааччы: «Арассыыйа эрэгийиэннэриттэн Урал Бэдэрэлинэй уокуруга күүстээх. Кэлии хамаандаларыттан Белоруссия уонна Узбекистан хамаандата бэлэмнэнэн аҕай кэлбиттэр».

Холобура, мини-футболга саамай тыҥааһыннаах оонньууну Уһук Илин бэдэрээлинэй уокурук Палестинаны кытары көрдөрдө. Манна биһиги дьоммут ыраахтан кэлбит ыалдьыттары 5-3 очконан кыайары ситистилэр. Оттон үрдүк таһымнаахтык ыытыллар онньуулар, биллэн туран тэрийээччилэр эппиэтинэстэригэр.

Григорий Назаров, күрэҕи тэрийээччи: «Тэрийэргэ Дирекция спортивных игр “Дети Азии” олус көмөлөстө. Туох наадыйарбытын барытын хааччыйан күрэх үрдүк таһымнаахтык бара турар. 20-тэн тахса волонтер үлэлии сылдьар, быраастар, полиция уонна Росгвардия күн аайы кэтии сылдьаллар».

Мини-футболга күрэхтэр күн бүгүн бүтэһик күннэрэ, бу спорт көрүҥүн сэҥээрээччиллэр "Кыайыы 50 сыла" спорт дыбарыаһыгар кэлэн бэйэҕит сөбүлүүр хамаандаҕытын тиийэн, өйүөххүтүн сеп.